Burgermeister und ratman zu Reichenbach den ersamen wolweisen bürgermeister und rathman der stat Gorlitz, unsern besundern günstigen, guten forderern. Unnsere frůntliche dinste zuvor, ersamen, weisen, lieben herren, besunder gönner. Euer erbarkeit thun wir wissen, das dise nachgeschreben: Hannus Besag, Niclus Grossman, Petir Windische, Jocoff Phaffe, Nickel Phaffe, Hannus Phaffe, Rudulf Kolax, Lange Nickel, Nickel Bruckener, unser liben methebůrger, bey uns wonende zu bůrgerrechte, dyweyle is got wulde, manche zeit unvorrucket ir eren keyn eyme ydermanne saubirlichin und fromelichin habin gehaldin, von guten fromen eldirn deutscher arth elichen sint geboren, ny anders von yn dirfaren noch dirkant habin denne allis gutt, und ny, als ir vornommen habit, mechtiglichen wedir dy vormaledeyten, snöden, vordampten ketzer durch des rechten glouben der cristenheit ritterlichen gevochtin, mit der hůlfe gotis helfin wedirstehen, uff der kirchen gut und ere uns helfin werin also frome gute lüthe. Und sie noch gerne bey uns wissen welden, wer is der wille gotis wie ir gefug. Wenn sie denne von denselbigen ketzern mit uns grosslichen an leiplicher narunge beschediget, gebrant und vorturbin synt, vorbas bey uns er narunge nicht getrauen zu haben noch ir wonunge, als das offinbar ist, darume sie durch eris besten wille zu uch habin gehaldin und vorbas ere wonunge meynin zu habin. Bethen wir eure ersame weisheit dinstlichen mit allem fleisse, das ir en zu eren gewerckin und handelungin, dy sie bey uch habin werden, hulfliche forderunge, euren getrauen rat fruntlichen geruchet zu irzeigen. Das wellin wir allezeit, wy wir mögin, mit allem fleisse williglichen gerne vordynen. Gegebin under unserm sigel anno 1431 am gründornstage.