Antiqua Boleslauia. – Johannes Cralouicz decanus et Johannes de Duba, canonici eccl. Prag. vicarii in spiritualibus archiepiscopatus Prag., notum facimus, quod vacante nuper decanatu eccl. collegiate SS. Cozme et Damiani in Antiqua Boleslauia Prag. dioc. per mortem Jacobi Luce nunccupati, vlt. et inmediati rect. eiusdem, qui in exilio diem suum clausit extremum, honorabiles dd. Andreas de Smylkow, Johannes Matrowecz, Johannes de Duba, Michael de Gyewiczka, Procopius, plebanus eccl. in Hradek, Johannes Chiba, Wenceslaus de Praga, Procopius de Chotyetow, Johannes Hostek, Andreas de Gyczin, canonici prebendati dicte eccl. Boleslauiensis, vocati per nos pro facienda eleccione futuri decani mediante nostra citacione contra ipsos et alios, quorum interest vel interesse poterit quomodolibet in futurum, ad certum terminum data et decreta, in ipso termino in loco infrascripto conuenientes personaliter et alii mediantibus procuratoribus et de eleccione futuri decani tractantes, tandem huiusmodi tractatibus prehabitis, Spiritus sancti gracia, ut firmiter creditur, inspirati omnes vnanimiter et concorditer nullo penitus discrepante suo et aliorum dominorum absencium de capitulo dicte ecclesie et vocem in capitulo habencium nomine in honorab, virum d. Johannem Chiba prescriptum, ipsorum confratrem, virum prouidum et discretum, litterarum sciencia et moribus virtuosis merito commendatum, vite laudabilis, in sacerdocio et etate legittima constitutum ac in spiritualibus et temporalibus plurimum circumspectum, vota sua direxerunt ipsumque vno spiritu et vna voce cum ipsis, ut prescribitur, ibidem presentem in ipsorum et predicte eccl. Boleslauiensis decanum et rectorem ipsius decanatus elegerunt nobisque eundem electum cum decreto eleccionis presentauerunt humiliter cum ipso electo supplicantes, quatinus dictam eleccionem approbare et eidem electo munus confirmacionis cum aliis ad hoc spectantibus inpartiri dignaremur. Nos igitur dicto decreto eleccionis viso et intellecto singulisque circumstanciis pensatis considerantesque prenominatos dd. canonicos modo honesto et deifico ac a iure permisso ad dictam eleccionem processisse, per ipsum electum dictam eccl. Boleslauiensem, que est in suis structuris et edificiis ex malicia perfidorum hereticorum demolita et destructa, posse ex fauore nonnullorum amicorum et fautorum suorum cicius reformari, iuxtaque dictum apostoli nemini cito manum inponi docentis facere et ad vlteriora procedere volentes, cridam seu proclamacionem in loco, vbi pro tunc ad causas audiendum et iura redendum pro tribunali sedere et officium in spiritualibus exercere consueuimus, et signanter in eccl. paroch. in Zitauia Prag. dioc., cum ad dictam eccl. Boleslauiensem propter tyranidem Wiklefistarum et Hussitarum non pateat securus accessus, et que eciam quasi funditus, ut prescribitur, existit in suis edificiis et structuris demolita et destructa, infra missarum solempnia fieri fecimus diem certum omnibus et singulis, qui se huiusmodi eleccioni aut persone electe opponere vellent, pro termino peremptorio statuentus. Cum autem in prescripto termino nullus legittimus apparuit contradictor nec aliudque canonicum intelleximus obstare impedimentum, ideo receptis ab ipso electo iuramentis debitis et consuetis prescriptam eleccionem approbauimus ipsumque electum ad huiusmodi decanatum instituimus curamque et administracionem in spiritualibus et temporalibus eiusdem decanatus eidem committimus. Dat. et act. Zitauie in monasterio SS. Petri et Pauli apostolorum ordin. fratrum Minorum in comodo, quod „infirmarium“ nunccupatur, a. d. M°CCCCXXV, indic. III, die XXVI mensis Febr. hora terciarum, pontificatus d. Martini pape V anno VIII, presentibus magistro Johanne Zul advocato, Mauricio dicto Machuta de Hostywarz, procuratore consistorii Prag, Philippo de Mykulowicz Olomuc. et Paulo de Holubicz Prag. dioc. notariis publicis.

Et ego Wenceslaus quondam Wenceslai de Praga, publicus notarius, predictis presens interfui eaque sic fieri vidi et audivi meque aliis occupato negociis per alium fideliter scribi procuraui etc.