Wir thun euch zu wissen, das uns worhafftige botschafft kommen ist, wie das sich die Prager und die Gretzer und die in demselben kreysse gesessen sind sich mit Sissken gantz und gar geeynet haben, und sich dorzu mit büchsen, bleiden, leitern und mit andern werhafftigen handwergken geschickt haben, und meynen uns in das land zu zihen mit grosser macht. Und wissen ouch anders nicht, wenn das sie heute oder morgen in das land sprengen werden. Dorome, liben herren und besundern fründe, beten wir euch mit allem fleisse und vormanen euch an den bund, als der uszweiset, das ir euch von stad an noch angesichte disz brifes dorzu schicket mit euer aller macht und mit allen den, die vor jugent adir vor alder dorzu togen, und nehmlich mit allen schultissen, lehenleuthen und gebauern, und uns zu hülffe kommen wollet, sulchen bösen ketzern zu wedirstehen. Wenn die Lemberger und andir stete et cetera auch als nu off den nehsten dornstag zur Landeshuta sein werden, dorumme bethen wir euch et cetera. Gegeben des sonabendes vor reminiscere in der 20 stund eylende.

Jorge Zcetteritz ritter und houptman et cetera den strengen houptman und manschoffte der stete zur Zittaw, Gorlitz, Bawdissin, Luban, Lubaw, Camentz et cetera und den vorsichtigen unde weisen bürgermeistern et cetera daselbist et cetera.