Testamentum Pauli Meyler civis Montis Chutten

Ich Paul Meiler Mitburger des Berges czun Chutten bekenne offinlichin mit diser schrift, das ich mit wolbedachten mut und mit guter vernuft ein sulich gescheft getan hab: Czum erstin so schaffe ich das all mein geltschult, di ich schuldig pin, von allen meinen gutern varund und unvarunden, wo ich dy hab ob der erdin und under der erdin, beczalt werde, die der Anna, meiner hausfrauen, wol wissentlich sein; und nemlichin dem Heinrich Saxenfelt, mitpurger von Prag, Herman, seinem pruder, und ir beider erben LXXXI schok grosser und X grosser, dy auch in des Bergspuch czun Chutten sein beschribin; und wanne ich in ader mein hausfrau sulche geltschult beczalt habin, so sullen sy mich denne und mein hausfrau derselbin mit der vom Chutten sigill und brive und auch mit der von der Igla sigl und brive quitt, ledig und loz sagn. Auch so schaffe ich von dem egenanten gut allen dem Pawlo, Jeronimes suen vom Piesk, meinem eniklein, IIC schok grosser und was darnach das uberigen gutis ist, das schaffe ich alles der Anna meiner eelichin hausfraun erblichin czu besitczen vor aller meniclichen ungehindert domite czu tuen und czu lassin, als ich ir des getrau und gelaub, ydoch mit sulicher underscheid, das ich das kegenwürtig gescheft, ab ich des hernach czu rat wurde, vorkern mag. Testes Johannes Ebrl et Chuncz Messrer. Actum feria IIIa proxima post Invocavit anno Domini Mo CCCC XXIIo.