Littera d. episcopi Olomucensis, quod dispensentur cum Wiklefistis.

Johannes, dei gracia episcopus Olomucensis, judex, commissarius et executor omnium et singularum causarum heresum, scismatum, doctrinarum erronearum dampnate memorie Johannis Wykleff et Johannis Huss heresearcharum, in provincia et diocesi Pragensi, Olomucensi et Luthomislensi quomodolibet exortarum et pululancium, contra quascumque personas, fautores, defensores seu imitatores ac fautores eorundem a sacrosancta et generali sinodo Constantinensi et sede apostolica ac a... d. Fernando, ... episcopo Lucensi, in Hungarie et Boemie regnis ceterisque terris et dominiis eisdem regnis suppositis apostolice sedis legato, specialiter ... deputatus,... venerabilibus viris dd. Johanni de Cralewicz decano et Johankoni de Duba, vicariis nostris in spiritualibus et canonicis eccl. Pragensis, salutem in Domino et mandatis nostris ymmo verius apostolicis firmiter obedire. Vobis igitur auctoritate huiusmodi delegacionis sacri concilii ac subdelegacionis prefati ... d. Fernandi nobis facte committimus per presentes, quatinus omnes et singulos homines vtriusque sexus, quos de premissis heresi et dampnata doctrina in diocesi Prag. ac districtis predictis inueneritis culpabiles et diffamatos aut vobis per quoscumque et vndecumque ducendos et presentandos, eorum audita diligenter confessione, si id humiliter pecierint, abjuratis prius erroribus, heresi et doctrina predictis prestitoque per eos in vestris manibus de stando mandatis sancte Romane ecclesie ac sanctissimi domini nostri pape Martini quinti et successorum suorum nostrisque atque vestris, iniuncta eis prius pro modo culpe penitencia salutari, a quibuscumque excommunicacionum sentenciis ac irregularitatibus et penis, quas oberrantes huiusmodi premissarum heresis et doctrine dampnate pretextu et occasione quomodolibet incurrerint, absoluatis et ad pristinos famam et honores restituatis. Datum Olomucz a. d. millesimo quadringentesimo vicesimo tercio, die VIII mensis Marcii nostro sub sigillo.