Hanns von Polentz voyt zu Lusitz an land und stat Gorlitz. Als ir mir nehst wedir geschriben habet umb herrn Wentschen von Donyn myn swogern, dem hob ich euern brieff gesand, der had myr dyse eingeschlossen antwort weder gesand et cetera. Als bitte ich uch mit besunderm flysse, ir wollet mit em vorkommen vor herrn Thymen von Kolditz und vor dy von Budissen et cetera. Und bitte uch, libin fründe, dos ir im die sache alst zu ende gehen, ir werdet dirvaren, das ich raubere in dyssim lande nicht gestatten wil. Und ich habe mich mit herren, mannen und steten so geeynet und vortragen, das raubere in disin landen zu husen und zu herbergen nicht gestattet wirt et cetera. Gegeben zu Lobin am dinstage nach Thome.