Teplicz. – Johannes Cralouicz et Johannes de Duba ᴐc notum facimus, quod vacante abbacia mon. S. Johannis sanctimonialium in Teplicz ord. S. Benedicti ordinario iure nobis subiecti per mortem Elizabeth de Dieczin, vltime rectricis eiusdem, ipsiusque corpore ecclesiastice tradito sepulture, religiose domicelle Elzka de Dubrawicz priorissa, Margaretha custris, Margaretha celeraria, Anna magistra coquine, Kaczka de Milessow, Adliczka de Wchinicz totusque conuentus monasterrii predicti attendentes, quod ecclesie regulares pastore destitute grauia in spiritualibus et temporalibus detrimenta paciuntur, termino iuris pendente certum terminum pro eleccione future abbatisse statuere curauerunt, ad quem cum pulsu campane conuocate simul conuenientes debitisque tractatibus inter se premissis, inuocata gracia Spiritus sancti, prout est moris, ac deliberacione matura prehabita, omnes vnanimiter et vna voce religiosam domicellam Margaretham Nicolai de Wssechlap armigeri dicte Prag. dioc. monasteriique antedicti professam, in ipsarum et dicti monasterii earum Teplicensis abbatissam elegerunt. Et quia pro parte dicte domicelle Margarethe electe cum decreto eleccionis fuimus requisiti, ut predictam eleccionem approbare dignaremur: nos iuxta dictum apostoli nemini cito manum inponi docentis facere volentes, de dicta eleccione et persona electa cridam seu proclamacionem in dicto monasterio fieri procurauimus, diem certam omnibus et singulis, qui se eidem eleccioni opponere voluissent, pro termino peremptorio coram nobis statuentes. In quo termino nullo contradictore apparente nec aliquo canonico inpedimento obstante, reputatis omnibus et singulis, quorum interest non comparencium nec quidquam contra premissa dicencium, contumacibus, ab honorab. viro d. Johanne, plebano eccl. in Rzehlowicz, dicte domicelle Margarethe electe procuratore legittimo, receptis debitis et consuetis iuramentis ac seruatis seruandis, prescriptam eleccionem confirmauimus necnon eandem electam in dicti monasterii Teplicensis prefecimus abbatissam et pastricem, mandantes dicto d. Johanni, plebano eccl. in Rzehlowicz, presentibus, quatinus antedictam domicellam Margaretham electam et abbatissam per nos institutam per se aut ipsius vicesgerentes in corporalem et realem possessionem dicte abbacie iuriumque et pertinenciarum eiusdem inducat et faciat inducere sine contradiccione etc. Dat. Zitauie a. D. MCCCCXXVII, die IV Sept.