Albrecht, von Gotes gnaden herczog ze Österreich und marggraf ze Merhern etc.

Erbern weisen und lieben getrewn. Als ir uns yecz habet geschriben, wie ew potschafft von den von der Igla sey kömen, das des concili von Basel legaten und auch die lantherren an ende von Prag sein geschaiden etc., nu habent uns dieselben von der Igla auch des geleichen geschriben. Doch wie dem ist, so begern wir an ew, was ïr fürbazzer von der veinde schikhung wegen werdet vernemen, daz ir uns das stetleich verkündet, damit wir uns desterpas gegen in wissen ze halten. Denn von Paulen und Marssen wegen, des Dürrtewfels knechten, die unser getrewr Oswalt der Gyczinger gevangen hat, schreiben wir yecz unserm getrewn Vlreichen dem Eyczinger, unserm haubtmann ze Znoim und emphelhen im, wie er mit denselben gevangen handeln sol. Geben ze Wienn, an ertag nach sant Pauls tag conversionis anno Domini etc. tritesimo quarto.

D(ominus) d(ux) in (con)s(ilio).

Den erbern weisen unsern lieben getrewn dem burgermaister und dem rat ze Znoim.