Albertus, Dei gracia dux Austrie, Stirie, Karinthie et Carniole, marchio Morauie comesque Tirolis etc., notumfacimus tenore presencium universis, quod attendentes benigne grata obsequia nobis per nobilem Iohannem de Bozkowicz, fidelem nostrum dilectum, hactenus exhibita, et que nobis facere poterit et debebit prestancius in futurum, sibique et uxori sue Elizabeth proinde et de gracia speciali donavimus et proscripsimus, damus virtute presencium graciosius et largimur decem marcas grossorum Pragensium Morauici pagamenti de iudicio nostro Noue Civitatis Vniczaw singulis annis ad cameram nostram marchionalem dari solitas, ita videlicet, quod dictus Iohannes et uxor sua prefata easdem decem marcas census annui deinde et peramplius singulis annis, quamdiu vixerint in humanis, percipere, tollere et levare valeant atque possint eo iure, quo olim magister Albicus phisicus habuit atque tenuit easdem, iuribus tamen aliorum in premissis semper salvis. Quocirca iudicibus nostris dicte civitatis Vniczaw presentibus et futuris districte precipiendo mandamus, quatenus ipsi memoratas decem marcas Iohanni et Elizabeth prelibatis singulis annis sic, ut prefertur, absque contradiccione dent effectualiter et persolvant, nam quocienscumque idipsum fecerint, tociens ipsos de dictis decem marcis quittos dicimus virtute prsencium et solutos fraude et dolo quibuslibet penitus proculmotis. Harum testimonio litterarum, sigillo nostri minori, quo in marchionatu nostro Morauie utimur, munitarum. Datum Brunne feria tercia proxima post festum Assumpcionis Marie Virginis gloriose, anno Domini millesimo quadringentesimo tricesimo quinto.

D(ominus) dux in (con)s(ilio).