Littera credencionalis universitatis studii Pragensis ad sacrum concilium per ambasiatores Bohemorum transmissa.

In nomine domini. Amen. Nos, Christannus de Prachaticz, ecclesie omnium sanctorum in castro Pragensi canonicus, parrochialis plebanus ecclesie s. Michaelis maioris civitatis Pragensis ac alme universitatis studii Pragensis rector, Augustinus de Glatovia, decanus facultatis arcium, Laurencius de Brzezowa (Wyzezowa), Petrus de Sepekow, rector parrochialis ecclesie s. Marie Virginis ante Letam curiam, Petrus de Grecz Regine et Johannes de Sobieslaw, arcium magistri, totusque cetus magistrorum dicte universitatis Pragensis meliori modo, via, iure (iura) ac forma et causa, quibus melius et efficacius fieri potest et debet, fecimus, constituimus et ordinavimus ac presentibus facumus et ordinamus nostros veros, legitimos et indubitatos legatos, ambasiatores, oratores, procuratores, factores, negociorum nostrorum gestores ac nunccios speciales venerabiles viros magistrum Procopium de Plzna, s. Henrici nove ac Johannem de Przibram, s. Egidii predicte maioris civitatis parrochialium ecclesiarum rectores, presencium exhibitores, ambos et quemlibet in solidum, ita tamen, quod condicio occupantis non sit melior, sed quod unus eorum incepit, alter eorum posset prosequi, mediare et finire, dantes et concedentes eis vel eisdem nostris ambasiatoribus, legatis, procuratoribus et oratoribus plenam, liberamet omnimodam potestatem et facultatem de et sub infrascriptis articulis iuxta formam pacti et federis, reverendorum patrum et dominorum sacrosancte sinodi Basiliensis, in spiritu sancto legitime congregate, et regni Bohemie et marchionatus Moravie, tunc legatorum et ambasiatorum consensu unanimi factam, dispositam, ordinatam nec non ratificatam, gratificatam et approbatam, utroque litteris pariter et sigillis ac manus stipulcione firmatam Prage et Iglavie sigillorumque appensione roboratam, in publica dicte sancte sinodi audiencia voce et in scriptis propalandi, manifestandi, offerendi et declarandi ac super eisdem, si opus fuerit, tractandi et conferendi eosdemque defendendi, probandi et persuadendi per scripturas sacras et beatorum doctorum dicta et sentencias, in eisdem fundatas, de ipsis quoque et quolibet eorum placitacionem, disposicionem et ordinacionem sacre scripture ipsisque sanctorum dictis et sentenciis consonam faciendi, acceptandi et aprobandi, ratificandi, enucleandi in hiis et universis aliis circa ea, que dicta sunt, et eorum accessoriis, condependenciis et connexis, promittentes bona fide, sicut premittitur, facta, disposita et ordinata per predictos nostros legatos et procuratores acceptata, approbata et enucleata, fideliter, inviolabiliter et inconcusse servare et tenere, ac si per nosmet ipsos sponte, benivole, deliberate ac presencialiter acta, gesta, placitata, disposita, acceptata, ratificata, enucleata fuissent. Tenor vero articulorum, de quibus fit superius mencio, sequitur in hec verba:

1. Circa discussionem in sacro concilio Basiliensi articuli de communione sub utraque specie ambasiatores regni Bohemie primum exhibebunt et proponent sacras sanctorum et doctorum auctoritates, in quibus poniturs hoc vocabulum precipit aut preceptum, mandatum aut consimile, ad discuciendum ad plenum iuxta compactata unacum nostris ambasiatoribus pro regula dei saluteque populi, pace et unitate ecclesie et regni Bohemie et marchionatus Moravie, desiderium communicandi sub utraque specie ad plebes.

2. Item postulabunt bullam libertacionis communionis sub utraque specie ad cunctum clerum universasque plebes dicti regni et marchionatus.

3. Item postulabunt secundum compactata a sacrto concilio litteras plures et mandata purificacionis, alias expurgacionis regni et marchionatus ad omnes principes et communitates, ubi necessarium et utile fuerit, et ad universos, cuiuscunque status aut condicionis existant, quatenus nullus audeat infamare ipsos Bohemos et Moravos aut eorum honori detrahere aut iniuriari quomodolibet publice vel occulte pro eo, quod communicaverunt sub utraque specie, communicant et communicabunt secundum compactata.

4. Item dicti ambasiatores scripturas atque auctoritates pro communione parvulorum proponent in sacro concilio cum postulacione, ut communio parvulorum sub utraque specie in regno Bohemie et marchionatu Moravie admittatur.

5. Item poterunt ambasiatores facere instanciam et solicitudinem in sacro concilio pro reformacione ecclesie in capite et in membris iuxta compactata.

6. Item poterunt ambasiatores ultra compactata et articulos prescriptos pro aliis, regno et universitati necessariis et utilibus, instare in sacro concilio servata semper reverencia et debita honestate.

In cuius vero testimonium presentes litteras nostras seu presens publicum instrumentum, per Johannem dictum Chwal, notarium publicum infra scriptum, scribi et publicari procuravimus sigilloque dicte universitatis apposicione iussimus communiri. Datum et actum Prage in domo prefati magistri Cristanni, rectoris universitatis predicte, ubi propterea specialiter fuimus congregati, sub anno a nativitate domini MCCCCXXXVII° indiccione XV, die sabbati sexta mensis Julii, hora quasi vesperarum, pontificatus sanctissimi in Christo patris et domini nostri domini Eugenii, divina providencia pape quarti, anno septimo ac serenissimo et invictissimo principe ac domino, domino Sigismundo, divina favente clemencia Romanorum imperatore semper augusto ac Ungarie, Bohemie etc. rege illustrissimo imperante, presentibus ibidem honorabilibus viris domino Wenczeslao de Kostelecz et Martino de Rakownik, presbiteris, ac prudentibus et discretis viris Petro Slanecz, Wenceslao Ostatek, nove civitatis Pragensis civibus, testibus ad premissa vocatis specialiter et rogatis.