Lieben getrewen! Wir tun euch zu wissen, das Czenko von Wartenberg, Vlrich von Rosenberg vnd die Stat von Prage wider ir trewe vnd ere sich gen vns vfleynen vnd sich vnser festen zu Praga vnderzogen vnd eyngenomen haben, vnd maynen vnser trewn vnd gehorsamen cristen zu sein vnd dy vnder druken vnd vorderben. Sunderlichen dar vmme als si vns schuld geben das wir Johannem Hus den keczer in vnsrem geleyte solten haben vorbrennen lassen vnd auch ettlich ander sachen das wir ir keczerey nicht wellen noch wolgen. Vnd wir wene auch das si euch des ir brife gesendet haben, dor umme ir ire bosheyt vnd vntrewe leuterlich erkennen werdet. Dauon so ermanen vnd warnen wir euch als vnser getrewn vnd reyne vnuormeylte cristen die in iren vetterlichen fusstapfen vnd gelauben vnuerrukt bestanden seyt, das ir in kristenlichem glauben vnd in vnser gehorsamkeyt gancz stete vnd feste bleiben sollet vnd wollet, vnd vnser stat in guter warnung behaldet. Wann wir ob got wil zu stund mit sulcher macht euch zu hulfe kumen wollen vnd mit gots hilfe sulcher bosheyt vnd keczerey wydersteen, das es euch lib sein schol, das ir in kristenlichen glauben vnd bey vns vesticlich bliben vnd bestanden seyt. Gegeben zur Sweydnicz, des freytags vor sent Jorgen tag, vnser reichs des vngerischen in dem XXXIIII vnd des Romischen in dem X Jaren.