In Niclas Gvmerawer Burger zu Eger Bekenne vnd thu kunt offenlich an disem brife vor allen den die In sehen ader horen lesen, das ich mit wolbedachtem mute guten willen vnd rechter wissen der Erwirdigen geistlichen Junkfrawen der Ebtissin der Meisterin vnd dem ganczen Conuent des Junkfrawen Closters sand Claren czu Eger der furmunde vnd vorsteer ich zcu disen czeiten pin, mein czehenden grossen vnd klein den ich gehabt hab auf dem dorffe czu neher voidersrewt mit allen rechten vnd nuczen vnd in aller mass als ich den ynngehabt hab vnd als der von dem Sigmund Junkhern an mich kommen ist zu rechten freyen eigen ewigem erbe vnd von dem heiligen Reich zulehen hab recht redlich vnd erberlich czukauffen geben vnd verkaufft vmb ein Summ gelts der ich gancz beczalt vnd awsgericht werden pin vnd sy dorumb Imtt ledig vnd loz sage vnd gelob mit disem brife In sulchen vorgemelten Czehenden von allen an sprachen vnd gen allermeniclich zufreien zuledigen vnd zu entwerren Jar vnd tag als des lannds recht ist vnd verczeyhe mich desselben tzehenden mit krafft dicz briefs so das ich mein erben vnd nachkommen noch nymants von mein wegen In tzukunffticlich dorem noch dornach nicht zusprechen noch tzureden haben sullen wollen noch mugen mit keym gerichte noch rechten noch an keiner stat geistlich ader wertlich noch in keinerweis wann ich yn sulchs tzehenden vor andern gegonnet vnd In vnd iren nachkommenden zugute fromen vnd nucz von besunder gnust vnd trew vnd irer pete wegen werden lassen habe doran sie auch von mir mein erben vnd nachkomen vnd allermeniclich von mein wegen vnbeteidigt ewiclich sein vnd bleiben sullen on alles geuerd, vnd gib In des zu warer vrkund disen briefe mit meym selbs eigen anhangenden Insigel vorsigilt vnd czu einer pessern geczewknuss haben dy Ersamen Cristoff delniczer vnd Cunrad haller beid des Rats zu Eger ire Insigel vmb meiner bete wegen yn on schaden auch an den brief gehangen. Der geben ist nach Cristi gepurt vierzenhundert vnd ym Sechs vnd dreissigisten Jare an sand vlrichs tage.