Lieber Peter! Vns sein drey deinr brief vnd der leczer auf hewt geantwurtt worden, die wir wol vernomen haben. So hoben wir dir vor bey frantzen Rummel gelt schiken lossen. Da verschreib vns zunehst, ob vnd wieuil dir des worden sey, daz wir vns darnach wissen zu richten. Auch haben wir dir vor verschriben im sinn zu haben, wenn sich das her einsmals wider herausz zu lande wenten wurde, daz du deinen fleiss tuest als — uil du macht, daz man an der strassen denn für vns heimzüg, des wir vnd die vnsern vor vast beschedigt worden sein vnd man vil auf vns gelegen ist; das schreiben wir dir aber, ob dir derselbe vnser brief nicht worden were, daz du vnser meynung in dem brief versteen mugest. Als du vns denn geschriben hast von pulfers wegen et cetera, also wiss, daz wir vnsers pulfers bey vns bedürffen vnd dir zu disen zeiten niht mer maynen zu schiken, das wiss nach vnserm besten zu verantwurten, vnd abczuslahen, ob des mer red an dich këme. Auch haben wir dir VI halb vasz weins kawft IIII franken vnd II elsesser vnd am nehstuergangen samstag bei vns ausgeschickt gen Eger zum Niclas Gumerawer, dem wir damit verschriben haben, denselben wein etwa einczubringen, vnd was du Im fürbas darumb schreibest oder empietest, daz er das tun sulle, vnd meynen auf dem nehstem markt etuieuil weins zu kawffen vnd dir in dem besten form zu schiken aber gen Eger, da wiss dich nachzurichten. Auch sind etlich vnser frewnde bey vnserm gnedigen herren dem Markgrafen gewesen von vnser notdurft wegen, der hat in erczelt vnter andern dingen, wie ir mit vnserm zewg vnd volk vast vngeczögenlich durch sein lande gezogen seyt, vnd im mer beschedigung getan süllet haben, denn fursten, herren oder yemant anders, der da für geczogen sey. Was dir darumb wissent sey, wie es gehandelt sey, das verschreib vns bey dem nehsten botten, so du eygenlichst macht, vnd lass des niht wan wir wider antwurt bedurffen werden, zu tun, vnd lass dich weder mü noch bottenlon verdriessen, vns oft zu schreiben eygenschaft der lewff. Datum sub sigillo magistri ciuium feria II^a post exaltationis crucis.