Sigismundus, Dei gracia Romanorum imperator semper augustus ac Hungarie, Boemie, Dalmacie, Croacie etc. rex, notum facimus tenore presencium universis. Etsi cunctorum subiectorum nobis fidelium prosperitatis comoda benigne respicimus et in augmento prosperitatis nostrorum fidelium ex innata nobis clemencia delectamur, illos tamen nostra serenitas amplectitur precipuis non indigne favoribus graciarum, quos pre ceteris in fidei constancia et indefesse fidelitatis obsequio circa nos et coronam Boemie rerum experiencia cognoscimus claruisse. Sane constituti in nostre maiestatis presencia cives, montani et incole opidi de Reichenstein, fideles nostri dilecti, nobis humiliter supplicarunt, quatenus ipsis universa et singula ipsorum privilegia, iura, literas, indulta, libertates, gracias, donaciones et concessiones necnon approbatas et laudabiles antiquas consuetudines, ipsis a serenissimis recollende memorie regibus Boemie, predecessoribus nostris, data et concessa ac datas et concessas, approbare, ratificare, innovare et confirmare ac de novo concedere graciosius dignaremur. Nos igitur, ipsorum supplicacionibus utpote racionabilibus benignius inclinati, pensatis nichilominus studiosis obsequiis per prefatos cives et montanos in Reichenstein predecessoribus nostris, Boemie regibus, hactenus impensis et processu temporis nobis uberius impendendis, ipsis universa et singula ipsorum privilegia, literas, iura, libertates, emunitates, gracias, donaciones et concessiones necnon approbatas et antiquas laudabiles consuetudines, ipsis civibus, montanis, opidanis et inhabitatoribus opidi Reichenstein a prefatis predecessoribus nostris data et concessa ac datas et concessas, non per errorem aut improvide, sed animo deliberato sanoque fidelium nostrorum accedente consilio approbavimus, ratificavimus, innovavimus et confirmavimus ac de novo concessimus graciose, approbamus, ratificamus, innovamus et virtute presencium regia auctoritate Boemie et de certa nostra sciencia confirmamus ac de novo damus et largimur, decernentes et volentes expresse predicta omnia et singula, acsi de verbo ad verbum presentibus forent inserta, perpetuis inantea temporibus inviolabilis obtinere roboris firmitatem, supplentes nichilominus omnes defectus, si qui in premissis ex defectu verborum solempnitatis obmisse sentenciarum obscuritate aut alia quavis causa vel occasione viderentur admissi, de plenitudine Romane imperatorie et regia Boemie potestatis. Inhibemus igitur expresse universis et singulis baronibus, nobilibus, militibus, clientibus, capitaneis, officialibus, magistris civium, scabinis, consulibus, civitatum, opidorum, villarum et locorum communitatibus et rectoribus earundem ceterisque nostris et corone Boemie subditis et fidelibus, ne ipsi aut aliquis eorum predictos cives, montanos, opidanos et inhabitatores opidi in Reichenstein in eorum iuribus, privilegiis, graciis, libertatibus, concessionibus, usibus et observanciis adversus nostre approbacionis, innovacionis, ratificacionis, confirmacionis et donacionis presens indultum impediant aliquatenus aut molestent aut suos impedire seu molestare permittant, quin pocius manuteneant, protegant realiter et defendant, prout nostram et regni nostri Boemie indignacionem gravissimam arcius voluerint evitare. Presencium sub nostre imperialis maiestatis sigillo testimonio literarum. Datum Prage anno Domini millesimo quadringentesimo tricesimo sexto die tredecima mensis Octobris, regnorum nostrorum anno Hungarie etc. quinquagesimo, Romanorum vigesimo septimo, Boemie decimo septimo, imperii vero quarto. Ad mandatum domini imperatoris domino G. cancellario referente Petrus Kalde, prepositus Northusiensis.