In nomine domini amen. Anno nativitatis eiusdem millesimo quadringentesimo vicesimo secundo, indictione quinta decima, die vero solis decima nona mensis Julii, hora vesperorum, pontificatus sanctissimi in Christo patris et domini nostri domini Martini divina providentia papae quinti anno eius quinto, venerabilis in Christo pater et dominus Rudigerus divina permissione abbas monasterii Sanctae Coronae Pragensis diocesis et religiosus vir dominus Theodericus magister curiae in Mugeraw professus ibidem ordinis Cisterciensis, in mei notarii publici et testium infrascriptorum ad hoc vocatorum et rogatorum praesentia personaliter constituti, et in suis manibus habentes quasdam litteras confirmatorias libertatum et privilegiorum ac iurium ipsius domini abbatis conventusque sui ac monasterii praedicti in pergameno scriptas, sigilloque rotundo regiae maiestatis illustrissimi quondam principis et domini domini Wenceslai dei gratia Romanorum regis semper augusti et Bohemiae regis felicis memoriae de cera alba in pressula pergamenea impendente, sanas et integras, non vitiatas, non cancellatas nec in aliqua sui parte suspectas, omnique prorsus vitio et suspicione carentes, quas ibidem in medium produxerunt, et ut asserebant, quod easdem litteras propter viarum discrimina, aquarum inundationes et alia diversa pericula pro eorum necessitate et utilitate undecunque locorum comode ducere non possent; et propterea ipse dominus abbas et Theodericus professus ipsorum dictique conventus ac monasterii nominibus huiusmodi litteras per me notarium publicum infrascriptum transcribi, publicari et in formam publicam transsumi et redigi petierunt. Et quia easdem litteras reperi ut praemittitur sanas et integras, dictoque sigillo ut prima facie apparebat sigillatas, ipsas de verbo ad verbum transcripsi et transumpsi ac copiavi, decretumque meum apposui, ita quod eidem transumpto in iudicio et extra ubicunque locorum in iudicio et extra exhibito seu producto ut ipsi originali plena et indubitata fides merito valeret, deberet et posset adhiberi, quarum quidem litterarum de quibus supra fit mentio sequitur de verbo ad verbum et est tenor talis: Opis listiny Václava IV. dané na Křivoklátu 18. června 1384. Acta sunt haec Pataviae in domo habitationis providi viri Vlrici Aczpekch civis Pataviensis, anno, indictione, mense, die, hora et pontificatu quibus supra, praesentibus ibidem honorabilibus et discretis viris dominis Leonhardo Sulczpekch presbytero, Conrado Mulher et Vlrico Aczpeckh praedicto civibus Pataviensibus et Johanne Scherer de Vntia(?) armigero Coloniensis diocesis, testibus ad praemissa vocatis specialiter et rogatis. Et ego Johannes Swenntt de Awrbach clericus Bambergensis diocesis publicus imperiali auctoritate notarius quia praedictarum litterarum confirmatoriarum exhibitioni et petitioni omnibusque aliis etc. Signum tabellionis.