Nos Barbara dei gracia Romanorum ac Hungarorum et cetera regina memorie commendamus tenore presencium significantes, quod nos die dominico proximo ante festum beati Michaelis archangeli per venerabilem virum magistrum Wenceslaum aule nostre vicecancellarium a fidelibus nostris Conrado Steck et Francisco civibus civitatis nostre Crempniciensis in suorum, universorumque et singulorum aliorum civium, hospitum, cohospitum et incolarum nostrorum dicte civitatis nostre Crempniciensis personis quadringentos florenos puri auri de pecunia presentis dicacionis exercitualis exercitus contra hussitas instaurati recipi et eosdem ad camaram nostre reginalis maiestatis presentari fecimus. Super quibus dictos Conrad et Franciscum universosque et singulos alios cives, hospites, cohospites et incolas nostros Crempnicienses quittos reddidimus pariter et absolutos presencium nostrarum vigore et testimonio literarum mediante. Datum in Dyossgewr in festo beati Michaelis archangeli anno domini millesimo quadringentesimo tricesimo secundo.