Přepis regestovaného dokumentu

Geschefft Andres des taschner

Desselben tags des Eritags vor Judica in der vasten komen fur den rate der stat ze Wienn maister Erhart von Eger und Kuncz Pawreytter, die taschner, und habent da gesagt, der vorgenant maister Erhart von Eger pey seinem treun an aides stat und der egenant Kuncz Pawreyter mit seinem starken aid ze rechter zeit, als sy ze recht solten, umb das geschefft, so maister Andre der taschner getan hat. Item von ersten hat er geschafft seiner hausfraun Dorotheen und seinen kinden, die er pey ir hat, alles sein gut, erbgut und varundgut, das er hinder sein gelassen hat, es sey innerlannts oder ausserlannts, nichts ausgenomen, in gleichen tail, ainem als vil als dem andern, doch also, das sy all sein geltschult, so er hinder sein ze gelten schuldig peleibt, von dem egemlten gut ausrichten und pezallen sullen. Item darnach hat er geschafft und der benanten seiner hausfraun empholen seine kinder auf ir treu innzehaben und ze ziehen, als sy Got am Jungisten tag darumb antwurten mus und als sy in des von muterleicher treu wegen suldig und pflichtig ist.