Přepis regestovaného dokumentu

Wir Fridrich von Gottes gnaden Bischoff Zu Bamberg. bekennen offentlichen mit diesem brieff, gen allermenniglichen. von solcher gebrechen wegen, Vnser getreuen Burgere, der gemeinde in Vnser Vorstadt zu Cronach gesessen. die Hernach berurt sein, Vnnd mit namen des schadens der In widerfaren ist, mit brande in dem Vergangen Jare, als die ketzere auss Behemer lande, Hieuor gewesen sind, Vnnd diese land leider schwerlichen mit brande Vnd name, beschedigt, Vnnd gewustet Haben. solich geschichte sie Vnsern lieben getreuen. den burgern des Rathes derselben Vnnser Stadt zu Cronach, zu sachen Vnd ettlicher masse Verdinsten des sich die selben Vnser Burgere des Rahtes. Vor Vns entschuldigt Vnnd ausgeredt Haben. Vnd sind also die In der Vorstadt gesessen, gen den burgern des Rats In Vnwillen gen einander gefallen, Vnnd doch aller solicher gebrechen Vnd schädens als sie Vns die beschriben geben haben. zu Vns gegangen Vnd bey Vns blieben gleicher weise auch Vnser burgere des Rates Vnnd ander In der Stadt gethan haben, Vnnd haben Vns beedenthalben semptlich geredt, Vnnd Iglich Person sunderlich mit Handt gebenden treuen an eydes stadt gelobt. Wie Wir das zwischen In auß sprechen Vnnd scheiden das sie das gentzlichen Halden, Thun Vnd Volfuren wollen. Also haben Wir Vns aller sache so Wir eigentlichst mochten erfaren, Vnnd die mit Rahte Vnser rete geratschlagt Vnnd gewegen Vnd erfinden. das soliche / brunst Im besten, das die in der Stadt waren, nicht vbereilt wurden, Vnd durch gemeines nutze der Inwendigen Vnnd ausswendigen geschehen ist. Dorumb sprechen Wir aus, das Vnser getreuen die In der Vorstadt gesessen sein. gen den Burgern des Rats Vnd andern In der Stadt gesessen, Vnnd sie widerumb gegen den in der Vorstadt gesessen. allen Vnwillen Vnnd arckwon sollen gentlichen hinlegen Vnd fallen lassen. Vnnd Hinfure gut freunde sein nachtbauerlichen leben, Vnnd einer den andern fordern. Vnnd auch In allen zimlichen sachen wider Vnnser Vnd Ire feinde an einander geuolgig geraten, beholffen Vnd beistendig sein, ongeuerd, Vnd auf das die armen in der Vorstadt, den ir Heusere sein abgebrant. desto gedultiger sein. So beweisen Wir In die gnade. Vnd freien sie also. das sie die nechst künfftigen zehen Jhare nach einander zu zelen. Vns noch Vnsern nach kommen, kein lant steuer geben sollenn. besunder frey sein Vnnd Vber haben werden. Vnnd sprechen dar zu das auch die Armen In der Vorstadt gesessen den Ihr heusere abgebrandt sein. Vnnd die ir leibss narunge mit teglicher Hand arbeit gewinnen, Von solchen Verbranden Heusern, die nechstkünfftigen Vier Jhare an der Stadt steuer nicht mitleiden sollenn. doch sollen sie wachen nach Irer Her komenden gewonheit alss offte das not Thut. so sie fleissigst mogen, Damit sie Ir selbs leibe Vnd gute bewaren. Vnd wan in solchen Noten. darvor Vns Vnd sie der almechtig got fur bass behute, beuestigung Vnser Stadt gross hoffnung Vnd ein gemein zu/flucht Ir Vnnd der Landschafft ist. So sprechen Wir das der angehaben graben biess zum Neuen Thurn, Vnnd fur bas Vnter dem Rosenturn sol ausgeworffen werden, so schirst das geschehen mag. dorin Wir Vnsern leuten in dem ampten auch geboten, Haben. zu arbeiten Vnd sprechen auch aus, das ein Iglicher in der Stadt oder Vorstadt gesessen. dar zu Helffen Vnnd fronen sol. Vnnd es sollen auch die In der Stadt gesessen. die auss der Vorstadt Vnd ander die Vnsern wen sie In solchenn noten zu In fliehen sie ain lassen, Vnnd das dem armen mit fronen als gleich gesche als dem reichen, so sollen die des Rates Vnnd In der Stadt, Vnnd auch die auss der Vorstadt aus Iglichen Virteyl einen oder zwen darzu bescheiden, do bei auch bede Burgermeister sein sollen, dieselben mit einander Vff Ir Stadt ein gesetze Vnd ordnung machen Vnd begreiffen Vnnd Iglichenn nach seinem Vermögen frone auff setzen sollen, das die armen nicht beschwert werden. Wir sprechen auch ob ettliche bestanden Heussere der Stadt mauern oder dem graben so nahent gelegen weren. oder ob ettlich zu nahend daran bauen wolten, das dauon der Stadt mit einlauffen Vbereilen, oder sunst schaden bekumen mochten, das die der die selbigen Heusere sein, Hinder sich oder anders wo sitzen. oder bauen sollen Vnd auch niemands gestanden. in solcher masse zu bauen, das man solcher sorge Vertragen werde. Vnd ob ettlich Ire Hoff stete gantz musten lassen liegen/den sol man anders wo Hoff stete beweisen. wie Vnser Castner daselbst mit den Burgern zu Rate werdet, auch sprechenn Wir, das alle die In der Vorstadt sitzen, Vnnd Heusere In der Stadt mauern Haben, dieselbigen Ihr Heusere, in den nechsten monat selbs betzihen Vnnd leiplichenn dor Inn wonen sollenn. Welch auch Vnbezimert Hoff stete In der Stadt Haben, dieselben sollen Von den Hoffsteten als wol als von den gezimerten Heusern wachen Vnnd fronen. als offte das nach ordenunge an sie kumpt, oder aber solich Hoffstedte Verkauffen, Vnnd man sol solich Hoffstedte Vnnd Heusere den kauffern geben Vmd einen gleichen werde, nach landes leufften. Vnnd ob der kauffer, Vnnd Verkauffer, darumb stösig wurden, so sol Ieder einen fromen man dar zu geben, dem er getrauet. Vnnd sol Von Vnsern wegen. darob sein Arnold Hilprand Vnser Castner, Vnnd Wolff Vom Hofe, Vnnd wie sie einmütiglich. oder der merer teile das Hauß oder Hoffstadt Werdigen Vnnd achten, souiel sol der kauffer do fur geben, auch als die In der Vorstadt Von den burgernn des Rats einer rechnunge begern, wie wol des nicht not were. wann all zeite der Halbeteile der Person des Rathes Vonn der gemein wegen dor zu gegeben werden. Iedoch zuuermeiden allen argwon. so sprechen Wir, das die burgere des Rates aus Iglichen Virteil In der Stadt, Vnnd aus der Vorstadt einen oder zwen frome man, zu in nemen, Vnnd den selben, Vnnd auch den die Von der gemeine wegen Im Rahte sein / rechnunge thun sollen, Von dem nechstuergangen Iare, Vnnd sollen fur bass keinen merklichen grossen baue an fahen noch thun, Vnnd auch kein leipgeding noch guldt oder zins zu ewigkeit oder auf benante Ihar Verkauffen, on Verhengnuss Vnser, Vnnd Vnser nachkomen. Vnd on beschlissung Vnnd willen beder burgermeistere, des gantzen Rahtes Vnd der Viertel meistere, der gemeinde In wendig Vnd auss wendig der Stadt gesessen. Ongeuerde. Es sollen auch die Burgermeistere noch Rate, gesessene leute, zum rechten on schulde nicht so geringliche fahen lassenn, noch schicken gethan es were dann ob einer misse thate beschuldig wurde. Vnd fluchtig wolt werden. auch als ettlich beschuldigt sein, das sie Ir habe nach dem. Vnd sie zu einander geschworen hetten leibe Vnnd gute nicht zu uerrucken & sollen geflöhent Haben. Vnnd auch ettlich des rates on wissen der andern, die mit in Raht sein gewesen. Vnnd auch on wissen der gemein den grossen turn sollen angefangen Vnnd gebauet Haben, der selben sach wollenn Wir Vns baß erfarn Vnnd denselben tag fur Vns setzen, Vnnd nach dem, Vnd Wir die schuld erfinden. mit In Handeln. auch sprechen Wir, das die so solich scheden, die sie empfangen Haben. leuterlich denn almechtigenn gott ergeben sollen. Vnnd das kein Person, man noch fraue Von beden theilen Vmb alle Vergangen sache Vnnd geschichte nichts / arges nachreden, efern noch andten sol weder mit worten noch werken. auch sich selbs oder Iemands anders schicken gethan. In kein weisse On alles geuerd. Vnd das Von beden teylen alle sache dester einmutiger Vnnd geuolgiger gehandelt werden, So haben Wir den Rate ditzs künfftig Ihare selbst besetz. also das bey Hansen Schentzlein der Von der burgere teile, Burgermeister ist sein sol, Wolff Vom Hofe. Albrecht Weyer. Wolff kunhaus. Contz reiff. Vnd Contz radacher, So sollen bey Heintzen Gumpolt der Von der gemeine wegen zu einem Burgermeister gegeben ist, sein. Albrecht Senff. Heintz hader. Contz polnraus, Hans keil, Heintz Schwarzacher, die selben gewonlich Eyde schweren sollenn das sie alle sache der Stadt getreulichen Handeln, Vnnd dem armen als dem Reichen gleich Vor stehen Vnnd thun. On geuerd. Darumb so gebieten Wir ernstlichenn, Vnnd sprechen auch. das ein Ieder Von beden teilen, Vnnd allermeniglich In gehorsam. Vnnd geuolgig sein sol. In billichen muglich sachen. Vnnd das ein Ieder, die ob Vnd nach geschriben Punct Vnnd artickel. die Wir ausgesprochen haben gentzlichen thun. halden. Vnnd Volfuren sol, als dann sie alle Vnnd Iglicher besunder, Vns mit treuen an Eydes stadt gelobt hat, Wir behaltenn Vns auch gantzen Vollen gewalt Vnnd macht, ob Iches in diesenn Vnnsern auss spruche, Vnuerstendiglich begriffen, oder Verkurtzt were, das zu/kleren Vnnd mitteln, Vnd zuentscheiden. Vnnd were es, das Iemands diesen Vnsern außspruch Vber fure, dem Vngehorsam were. oder dowider theten mit worten oder wercken, der oder dieselben solten des nicht geniesen, Vnnd daruber Vns Verfallen sein Hundert pfundt Vnleslichenn zu bezaln, doch in allen sachen behalden Wir Vns, Vnser Vnd Vnsers Stifftes rechtenn. ongeuerd. des zu Vrkunde Haben Wir Vnser Insigel an diesen brieff gehangen. der geben ist am Montage Vor Sant Anthonien tag nach Christi geburt Virtzehen Hundert Vnnd darnach in dem ein Vnnd dreissigstenn Iharen.