Wir Albrecht von gotes genaden byschoffe zu Regenspurkg, embieten allen fürsten, grauen, freyen ryttern vnd Knechten, den räten vnd den gemainen aller stet, markchten, dorffern vnd gemainchklich allen christen menschen vnsers bystumbs daz hayl in got dem herren vnd alles daz wir guetz vermügen. Erwirdigen, getrewen, besunder liebhaber vnd diener des allmächtigen gotes. Als ewch nu wol wissenlich ist, wie das pöz vnchraut des falschen vndiets, des verdampten volks der Hussen mit angenomer pöshait irer falschen ler vnd vngelaubens das haylsam edel chrawt vnd den waren sam christenleichs gelaubens, den der almächtig got vnser herr Jesus Christus mit seinem pittern tod vnd vergyessung seines rosenuarben pluets hie in die werlt gepflanczt vnd gepawt hat, zuuertreyben vnd zuuertilgen vormaynet, vnd daz zu vnterchomen vnd fürzusehen hat vnser heyliger vatter pabst Martinus, vicari des almächtigen gots hie auf erd. geuaren alls ein getrewer garttner, der daz vnchrawt ausrewtt vnd auswirft, daz daz edel chrawt nit verderb vnd auch zu geleicher weis alls aines werltlichen herren öbrister marschalkch, der seines herren panyer auffwirft alls er streyten soll, also hat er auch des öbristen herren. vnsers herren Jesu Christi banyer, daz ist daz heylig chrewcz auffgeworffen. daz man das verchünden vnd predigen soll. czu demselben banyer all christenmenschen zefliehen vnd darunder vmb den nam Christi zefechten vnd ze streyten schuldig sein. Vnd darauff so berüeft der benant vnser heyliger vater ainen sollchen gaistlichen solld aus. alls dann der allmächtig got seinen rittern vnd Knechten, den heyligen martträrn geben hat. die ir pluet durch verhalltung wegen christenlichs gelauben vergossen habent. Des haben wir vnsers vorgenannten heyligen vatters des pabsts brieff, als vns die der hochwirdig vnser lieber herre der erczbyschoffe von Salezburgk vnder seinem vidimus vnd versigelten brieffen zugesant hat. die vnder andern geschriefften ainer sölchen lawt sind: Das all christenmenschen, wie die genant sein, die sich mit lautter gewissen, volkomnär peycht vnd andächtigem herezen durch behalttung christenlichs gelawbens bezaychen mit dem zaychen des heyligen chrewszs vnd wider das vndyett ze streytten vnd zeuechten vnd das zu uertilgen vnd abzetuen gebent, die werden ledig gesagt aller irer sund, wie die genant sind. Weliches mensch sich auch darczu gibt, als es oben begriffen ist, gieng der von tods ab vnderwegen, das er zu dem vndyet nicht gelangen möcht, der würd dannoch der genaden alls gancz taylhafftig, als er mit dem vndyet gestriten vnd geuochten hiet. Welcher mensch aber mit seinem aygen leyb vor altter oder chrankchait wegen wie das genant wär, das also nicht verpringen möcht, schikcht er dann ainen andern mit seinem guct an seiner stat dahin, der wirt derselben genaden taylhafftig mit sampt dem, der dann also geschikcht wirt. Sölchen grössen ablos vnd genad zu erwerben erwecht vnser heyliger vatter all Kristenmenschen vnd pitt die durch die lieb vnd namen vnsers lieben herren Jesu Christi vnd seines rosenuarben pluets, daz er vmb all christenmenschen vergossen hat, daz wir vns zu vertilgnüss des vndyets des verdampten volks der hussen vnd Wicleuisten willichklichen geben wöllen. Des geleichen pitten vnd monen wir all die obgenannten, alls die oben geschriben sind, vnd darczu all geystlich ordnung vnsers bystumbs mit welicherlay die begriffen sind, daz sie sich darnach schichken, fürsehen vnd ordnen mit irem leyb vnd guet. Ob das zu schullden chöm, als wir denn von ettlichen hochgeporen fürsten von Bayrn erwirdiger potschaft, die sie vns zugesant habent, vernomen haben, wie denselben fürsten gewisse wordnung chomen sey, das daz benant vndyet in daz lant zu Bayren vermaynent zu zekomen vnd zezyehen, daz dieselben fürsten vns nit allein sunder andern fürsten vnd iren landen vnd lewten verchunden habent lassen. Darczu wir vns mit sampt vnserer pfaffhait, wie die genant ist, nach ganczen vnsern vermügen durch die lieb des allmächtigen goczs willichklich geben haben. Desgeleichen getrawen wir allen Getrewen christenmenschen vnsers bystumbs vnd monen sie pey den genaden, der sy darumb taylhäfftig werden, daz sie sich dez geleichen auch darczu geben vnd taylhäfftig machen wollen. Auch so mach wir sy darumb taylhäfftig aller genaden vnd güettät, dye in allen stifften vnd gotzhäwsern vnsers bystumbs verpracht werden. Geben zu Regenspurkg am pfincztag vor Thome apostoli anno domini MCCCCXX° mit vnserm auffgedruckten insigel versigelt.