Přepis regestovaného dokumentu

Wir Sigmundt von gottes genaden Romischer Kunig zu allen Zeiten Merer des reichs und zu Hungern, Behaim, Dalmatien, Croatien, etc. Kunig. Bekennen und thun kunt offenbar mit dissem brief allen den die in sehen, horen oder lesen. Wan wir den Hochgebornen przimken Herczogen zu Troppaw unserm lieben oheim und fursten fur sein Jargelt und Dinst funfzehentausendt und vierhundert ungerische gulden und vierhundert schok Behamischen groschen die wir seinen Dienern fur Ire scheden die sy fur prage empfangen haten recht und redlich schuldig seinund gelten sollen und dauon so gleben wir Im und seinen erben bey unsern kunigkligen worten mit guttem rate, wolbedachtem mutte und rechter wissen dasselbe gelt zurichten und zubezallen in drey Jaren. Nemlych auf weinachten nechst kunfftig funftausent anderthalb hundert gulden und anderthalb hundert schok Behamischer groschen. Item darnach aber auf weinnnachten sic! funfftausent anderthalb hundert fulden und anderthalb hundert schok Behamischer groschen bis wir Im die vorige suma funfzehentausendt und vierhundert ungerische gulden und vierhundert Schok Behamischer groschen gancz und gar berichtet und bezalt haben on alle geferde. MIt urkund dises briefes versigelt mit unserm anhangenden Insigel. Geben zu Olomucz nach Cristi geburt vierzehenhundert Jar und darnach Im einundzwanzigsten Jar an Sant Georgi tag unser Reich des Hungerischen etc. Im XXXV. und des Romischen im XI. und des Behamischen In dem Ersten Jar.