Přepis regestovaného dokumentu

Vnsern willigen dinst zuuor. Ersamen, weisen, liben herren. Wir lassen euch wissen, daz wir alz an suntag wider czu vnsers herren gnaden markraff von Bramburk kumen alz vns sein gnaden den peschiden hat, vnd do retten wir mit sein gnaden vnd paten sein gnaden mit ganczen fleiss, das vns sein gnad fursehen wolde vnd erczelten vnser gross darlegung vnd vnser grosse willikeyt, daz peste, vnd wir kůnden das vns sein gnaden erlawbt heymzurůkken als ander herschafft aufgeprochen weren. Darauff vns sein gnad antwort vnd můt von vns ym czu verfolgen mit vnser pogssen, schůczen vnd ouch geraysigen geczewgt. Darauff wir sein gnaden wider antwort vnd paten sein fürstenlichen gnaden vns furczusehen, wan wir doch mit dem ersten in daz felt gerükt weren vnd alczeit willig weren gewest vnd noch alczeit getun hetten, daz nyemant getan hot vnd daz wir grosse, swere czerung vnd darlegung dargetan haben mer dan vnser vermůgen vnd prochten daz fur sein gnaden daz pest als wir kůnden, dan daz wir so wer mit sein genaden retten, daz ez auff ein sulchen peliben ist, daz wir mit vnsern gerayssigen geczewgt yo mit schüllen fur den Korlstain helffen zu retten vnd pat vns sunderlich mit fliss das wir vns ein sulchs nicht zu swer liesen sein, wan wir vormals alczeit spest vnd willig gewesen weren vnd daz noch noch sic tun. Vnd darczu sprachen di pemischen herren, alczůmol liben freunde, ir habt vor alczeit spest tûn, tut noch spest, wan wir euch des danken wollen vor vnsers gnadigen herre, dem kůnig vnd daz wellen wir furpaz von euch verdinen, wan wir sehen vnd erkennen, daz ir mer tut, dan ir mugt. Vnd liben herren, was wir darumme getun haben, das haben wir durch ewrs pesten willen getan, wan wir noch layder sorg haben, das der Karlstain ee on geredt peleib dan geredt werd, wan wir iren wellen darinnen haben müssen tun. Auch liben herren lassen wir euch wissen, daz wir mit vnsern hawpman gret haben von vnser soldner wegen, vnd ir furpaz mit ym geret hat vnd vns von iren wegen zugesagt hat, daz sy daz noch der anczal gerne tun wollen alz ir vns dan geschriben habt. Vnd liben herren wist, daz pischoff von Wurczpurck vnd pischoff von Pawmberg, das man yn vbl vnd nicht wile gucz nochredt, daz sy alzso stumpff vnd so leicht auss dem lande von Pehem gerukt sein. Auch liben herren, wir lassen euch wissen, daz markraff vom Branburk alz an suntag potschafft kůmen ist von dem Karlstain wie daz die Hussen alz an donirstag war gestürmpt haben mechtikleichen vnd haben denselbigen tag vier sturmme mit ym gehabt dan das sy allweg mit macht ab wieder getrieben haben alz die Hussen abgereiten sind vnd sich wider legetten vnd do luffen sy her ab von dem Karlstain vnd haben ir ein gut ort abgeslagen. Vnd liben herre wist, daz ich euch gelihen hab XX ff pehm., pit ich euch mit fleisse, daz ir diselbigen richt mein swager Jurg Sindel adder meiner hawsfrawen. Vnd wie sich di sach fupaz machen wůrd daz wollen wir euch zu wissen tun pei tag vnd nacht vnd wollen allczeit vnser pest tun in allen sachen vnd darinnen willig sein. Vnd liben herren richt von euch herrn Hansen vnsern caplan wan der alczeit willig vnd spest getun hat nicht meer zu dissen zeitten, den der lib got sey mit vns allen. Geben on montag vor Symonis et Jude anno XXII° et cetera.