Anno eodem MCCCCXXI dominica quarta, XVII Kal. Julii in die Sancti Viti Ratisponenses iurauerunt velle esse orthodoxos ac orthodoxe fidei defensores, jubentes hoc idem facere sicut et factum est, sibi tunc subiectos in praeurbio ciuitatis Ratispone dominica proxima sequenti secundum formam subscriptam:

Lieben frewnd arm vnd reich. Als ir dann geuordert seyt, tuent euch mein herrn vom rat vnd die xly zu wissen, daz sy mit des heyligen Römischen Reichs kürfürsten vnd mit des Reichs steten gemainkchlich ainig sind worden von der keczerey vnd vngelaubens wegen, der layder in dem künigreich zu Bechem aufferstanden ist, daz ein yeder der über zwelf iar alt ist, vnd vernünftiger synn ist, geloben vnd zu den heyligen sol swern, wider sölich keczerey vnd vngelauben ze sein vnd die rüegen vnd melden, wo man die wais, des haben mein herrn vom rat vnd die xlv hincz got vnd den heyligen gesworn, vnd haben auch die herren vnd die stet vnd all dy irn ettleich gessworen, vnd werden auch noch alle sweren. Gleicherweis mainent vnd wellent mein herren, das ir daz auch tüet vnd hinfür meldet vnd füerbringt. Der nicht gesworn het, oder der yeczund nicht anhaim wär, der würd hinnach sweren.

Forma juramenti.

Daz ir Kristen gelauben, darynn ewr vodern gestorben sind, ewr lebtag haltten vnd retten wellet vnd wider dye newung der keczerey vnd vngelauben, wo ir dy wisst, rüegen vnd melden welt, vnd die helffen halten vnd antwürtten, ez sein frawn oder man, geystlich oder werltleich, an dye stet, da mit gericht yeder hin gehört, trewlich on als geuär, dez pitt ew gotzs helf vnd all heyligen. Factum est autem hoc juramentum post primam horam diei prescripte.