Přepis regestovaného dokumentu

Senatus Gorlicensis dem edlen her Sigmund von Wartinberg, her zu Tetzchen und zu Blanckenstein, unserm sünderlichen gönner und fürder. Unsir willige dinste et cetera. Is ist gescheen, das wir vor zeiten einen früntlichen entscheid und vorrichtunge zwischen den ersamen rathman der stad Breszlaw an einem und Langeheintzen genant Heintze Reuter am andern in gegenwertikeit der gestrengen Hannus von Polentz, foite zu Lusitz et cetera, Foitlenders von Geriszdorff und Heintze Kottewitz, unsres gnedigsten herrn des Romischen et cetera kuniges mann deser lande, Benedicten von der Ibe, Janken Knobelauch hauptmann zum Höenstein, Mikusch houptman zum Tolensteine und Ulrich Dobraschs an Langeheintzen theile. Nue haben uns die vorgenanten rathman der stad Bresslaw geschrebin, wie das sie vornemen, das derselbe Heintze Reuther der vorrichtunge meinet auszugehen, die sachin vorneuen und underwinde sie und die stad in anspruch zu zihen, und habe sich dorumme an euer edelkeit gewurffen. Und doruff seint sie also und umb des wille von uns begerende, bittende euch zu vorschreiben und zu undirrichten sulches entscheides eine auszrichtunge nach laute unsers statbuches et cetera. Als der vorgenante Heintze Reuther den erben rath zu Breslaw schuldigte, das her seines rechten zum Rainhart von Prage von sulchs gefengnisse wegin, dorein her von seinen wegin gesatzt ward, nicht hette mocht bekommen und umb alle ander et cetera: so seint sie gantz gesůnet mit beyder teile gutem willen et cetera. Edeler liber herre! Als ir denn wol vornehmet, das wir von dem rathe zu Breszlaw gebeten sein, euch zu underrichten solcher sachen entscheyt und ausrichtunge, als das obin berurt ist, so beten wir et cetera den Heintzen dozu vormögen und zu underweisen, das er sulcher vorrichtunge eine fulge thu, die haldt et cetera. Geben zu Gorlitz des suntages noch sand Alexii tag anno 1428.