Přepis regestovaného dokumentu

Conrat erczbischoff zu Mencze und Ludwig, pfalczgrave bii Ryne et cetera und herczeg in Beyern. Unsern fruntlichen grůss zuvor. Ersamen, wisen, guten frunde! Als ir wol vernommen habt, wie die hussen und keczer von Behem ycz ettwelang cziite in dem lande zu Miissen mit eynem grossen, mechtigen here umbgeczogen sin und mit morde, brand und manicherley vergiessung cristensblutes und verstorunge manne ... und frawen ... clostere und kirchen grossen, verderbplichen schaden getan und zugefugt hant, das alles nit zuschriben ist, des ist uns yczund gewisse und ware botschaft kommen, das dieselben hussen und keczer Plawenburg und stat gewonnen, viel reysig und ander lute darynne erslagen und ermordet haben, und sin nu vor den Hoff geyagen und ziehen ummerme gen Bamberg und Wirczburg zu, und understend die lande alle also herabe zuverderben, zu verwůsten und zuvertilgen, das allen cristen ... fursten und cristengleubigen billich zu herczen gen sal. Herumb so begern und bitten wir uch fruntlich mit ernst, das ir, uwer frunde mit macht von dinstag nechstkunttig uber acht tag, das wůrdet mitnamen uff den dinstag sant Veltins tag, zu nacht gen Worms wollet schicken zu uns und andern unsern mitkurfursten, fursten, graven, herren und stetten, die wir off die ziite auch dahin zukommen beschrieben han, umb uns daselbe miteinander zubesprechen und zuunderreden, mit was wegen, und wie den vorgenannten hussen und keczery allerbequemlichst und beste zu widerstend sii, und wollet des mit sumen als wir uch wol getruen, wann ir wol verstend, das das der ganczen cristenheit und gemeynen dütschen lande ein gross notdurfft ist. Geben uff den mittwoch unser frawen abend purificacionis, anno et cetera XXX°.