Přepis regestovaného dokumentu

Nicolaus miseratione diuina abbas monasterii Waltsassen ordinis cisterciensis, orationes debitas bonorumque omnium salutiferum incrementum. Nouerint uniuersi christifideles cuiuscunque preeminentie siue status, quod ex parte deuotarum ac religiosarum sanctimonialium ordinis sancte Clare, cenobii in Egra Ratisponensis diocesis quedam littera in membrana pergamenea scripta, sana et integra non abrasa nec in aliqua sui parte viciata, omni prorsus suspicione carente, extat exhibita ratione testimonium atque ad excludendum pericula, que ex crebra huiusmodi littere originalis tractatione suboriri possent per nos transsumendam, quam sic ut perfertur vidimus immunem ab omni vicio, more Romane curie bullatam bulla plumbea in cordula sericea ex filis rubeis ac croceis seu flauis contextis pendente, et hec bulla habebat figuras et caracteres atque titulum sanctissimi Romani pontificis prout in capite eiusdem littere pronunctiabatur, cuius tenor sequitur per omnia in hec verba:

Bonifacius episcopus seruus seruorum dei, dilectis in Christo filiabus uniuersis abbatissis et conuentibus monialium inclusarum siue ordinis sancte Clare siue sancti Damiani seu minorisse dicantur salutem et apostolicam benedictionem. Laudabilis sacra religio que in monasteriis vestris a uobis et aliis personis in eis degentibus sub onere uoluntarie paupertatis iugiter colitur, sic a uobis mundane dissolutionis relegauit illecebras, ut inter alia claustralis abstinentie nexibus relegate, puritate fulgeatur obseruantie regularis et voluntatis libitum coartantes omnino sub obedientie debito, dignam et sedulam exhibeatis domino seruitutem. Hinc est quod nos pium et congruum reputantes, ut nos illa prosequamur gratia, quam vestris necesitatibus fore prospicimus optimam uobis uniuersis et singulis, auctoritate presentium indulgemus, ut ad prestationem decimarum de quibuscumque possessionibus et aliis omnibus bonis uestris, que in presentiarum habetis et iustis modis prestante domino acquisieritis in futurum, uel ad contribuendum in procurationibus, quorumlibet ordinariorum et etiam legatorum et nunctiorum sedis apostolice, et quibuslibet taliis et collectis et ad exhibendum pedagia, telonea et alias exactiones quibusuis regibus principibus seu aliis personis secularibus minime teneamini nec ad id compelli aliquatenus valeatis. Nulli ergo omnino hominum liceat hanc paginam nostre concessionis infringere, uel ei ausu temerario contraire. Si quis autem hoc attemptare persumpserit indignationem omnipotentis dei et beatorum Petri et Pauli apostolorum eis se nouerit incursurus. Datum Anagnie iiii nonis junii pontificatus nostri anno secundo.

Littera uero presentis transsumpti siue vidimus data est anno domini millesimo quadringentesimo vigesimo quarto, die tredecima mensis nouembris, que est dies beati Brictii confessoris atque nostro sub sigillo hic in testimonium sub appenso.