Přepis regestovaného dokumentu

Wir Hennrich, genand Rumpold, von Gotes gnaden herczog In Slesien, Herre zcu Grossin Glogaw, Voyt zcu Budissin, Gorlicz, Sittaw etc., Bekennen uffintlichen In desem brieve, Das wir von den Eldisten der Egenanten land unde Stete gantcz vnd eyguntlichin undirrichtid, das daz Closter Merchinstern vnns als eyme Voyte der Egenanten lande vnnd Stete nicht mer pflichtic ist awszcurichten vnnd fur vnns keinen Voyte mer awsgerichtit haben In krige ader Herfard, denne czweene wagin, gespeiset nach Alder gewonheit vnnd saczunge, eynen wagin von den gutern, die vmb Bernstorff gelegin sein, vnnd den andern wagin von den gutern, die vmb das Closter gelegin sein. Thun sie vns dorobir ichts von eigenem guten willin, liebe vnnd dienste In desin lewstin, Als ap sie Iren voit mit vns sendin durch sterkunge wille des heiligin Cristin glawbins, das wollin wir vmmb das Closter vorschulden vnnd En des danck sagin vor vnsirn gnedigin herren dem koninge, vnnd gloubin, sie bey sulchir allir alder gewonheit, saczunge vnd freiheitin zcu lassin vnnde zcu behalden furbass mer, vnnd nicht hochir raitwingen noch czu dringen, noch keines hochir zcu mueten, mit vrkund diss brieffis. Czu bekentniss haben wir vnser Ingesegil vff desin brieff lossin drucken, der gegebin ist Im lande zcu Merhern vnnd bey der stad Olmucz Im felde am freitage vor Symonis vnnd Jude apostolorum anno vicesimo primo.