Přepis regestovaného dokumentu

Hanns von Hackinborn: den gestrengin irbirn vorsichtigen und weysinn mannen der land, stete Budissin, Gorlitz, Sittaw et cetera, mynen gutin besundern libin fründin und nockborn dari debet. Mein früntlichen dinst et cetera, libin nacbor, als ir meinem bruder und mir schribit: Wy dy von Gorlitz land und stadt an uch brocht hettin fredebroch, dy denne dy unsern nemlich Hanns Wildinstein an herzoge Hans sulde gethan han, thu ich üch zu wissen, das mir dy von Gorlitz auch dorumme geschrebin hattin et cetera, und bitte uch libin nacbor, ir welt mit den von Gorlitz reden, das sie doran syn, das sy uns mit demselbin herzogen eynen tag legin vor üch in einem bethedingeten frede, und do myt ouch irkennen, welch teyl gebrochen hat am andern et cetera. Auch, libin frünt und guten nackbor, als ir mir schrebit und begert eynen frede zue lyden bis uf sinthe Michels tag, thu ich uch zu wissin, das mein bruder itzund nicht by mir ist und ich auch meiner mann nicht by mir habe et cetera. Dorumme ich reiten muss, und so balde als ich hinder mich komme, so wil ich uch noch rathe meines brudern und unser manne eine antwort schrebin et cetera. Gegebin am dornstage nest vor phingistin 1427 zum Zar.