Přepis regestovaného dokumentu

Ich bruder Vecencz Comptor zu Breslaw czum heyligin leychnam bekenne off in desim bryfe allen, dy en sehen adir hoeten (!) horen lezen, das vor mich komen ist Clement Cesar und hot bekant, das her recht und redelich vorkowfft hot eyne halbe mark jerlichis czinsis ume wunff mark grosschen behemischer muencze und polenischer czal der pietancien unsers hawses czu Breslaw of czwene morgen erbis und darczu of alle seyn gut, dass her hot adir besitczit zu dem Newdorffe, do von globit der egenante Clement Cesar vor sich und uor seyne rechten geerben und nochkoemelinge der pietancien vnsers hawsis alle ior eyne halbe mark czinses czu gebin an allen arg und hindirnisse an czu heben czins zu geben of sinte Michils tag eyne fyrdung, der donn neste zu konftig ist, und of sinte Walpurgis tag eynen fyrdung, und dor noch uf dy geschrebin tage jerlich zu geben an arg und wedirrede, dach mit suelchem undirscheit, wenn is de egenante Clement Czesar adir seyne geerben vormoegen, zo sal man en guennen dy halbe mark czins wedir abeczu koewfen ume wuenff mark grosschen der egenanten moenczen und czal unschedelich vorsessin czinsin noch wachin czal und unschedelich des Compters erbe czinsin und seynen rechten, des zu bekenthenis habe ich obgenanter Comptor meyn Ingesegil gehangen an dezin bryf, der gegeben ist noch gotis gebort fyrczenhudirt jar dor noch in dem eynundczwenczigisten iare an dem montage noch sinte Urbans tag.