Přepis regestovaného dokumentu

Wir Wenczlab von Donyn, richter, Hannus Reinswerk, Hannus Lemmel, scheppenmeister, Hanman Alder, Niclas vom Pissk, Hannus Spisglas, Cristan Goltsmid, Peter Chrempniczer, Francz Geier, Hannus Cammer, Herman Gros, Stephan Czimerman, Wenczlab Topler, Mertem Naz, Hanko vom Rosental und die andern scheppen alle gemeinlich und dorzu die ganz gemeine des Bergs zun Chutten, bekennen offenlich mit disem briue allen den die in ansehen ader horen lesen, das wir miteinander mit wolbedachtem mute durch grosser und erhaffter note wegen die uns swerlich angelegen ist recht und redlich vorkaufft haben und vorkauffen in crafft diz briues uff uns und unsere ganz gemeine drei schok guter grosschen prager munze jerlichs zinse dem erbern manne Hannus Grill, unserm liben mitburger und seinen erben um dreisig schok grosschen der egenant münze die wir von in bereit enphangen haben und die gemeinlich an unsern nuz haben gewendet, also das wir und alle unser nochkomen ein halfenteil des selben zinses, das sein anderthalb schok grosschen des egenanten geldes in zinsen und reichen sullen uff sent Jorgentag der am nechsten vom datum diz briues kumpt und das ander halfenteil, das sein auch anderthalb schok grosschen des vorgennan geldes uff sent Gallentag der dornoch am nechsten volget und also alle jare jerlichen zu zinsen uff dieselben zinstege unuerzogenlich als zinses recht ist an alles widersprechen uff welchem obgenanten zinstage wir den zins als obengeschriben stet nicht richten und bezalten, so sal alzuhant die weil der zins von uns nicht gericht wirt uff ein itlich schok grosschen des vorsessen zinse alle wochen sechs grosschen zu rechter zinspusse gen und wachsen, wenn denne der egenanten Hannus und sein erben des vorsessen zinses mitsambt den pussen die doruff gewachsen weren nicht lenger emperen wolden, so mugen si mit eigner macht ader mit hulfe richter und der scheppen des Bergs zun Chutten die in zeiten werden sein, uns und unser gemeine pfenden die pfant treibn tragn furn und fur iren vorsessen zinse und alle zunspusse die doruff gegangen weren geteilt ader miteinander ungehindert vorkauffen ader vorsezen zu cristen ader juden an uffgebot eines itlichen gerichtes als ir eigene guter mit vollein rechten und das so offte zu tun als offt der vorsessen zinse mitsambt den zinspussen die doruff gegangen weren von uns ganz und gar beliben unuergolden, were aber das dem obgenant Hannus und seinen erben fur iren vorsessen zinse und zinspusse die doruff gegangen weren nicht fuglich were uns und unser gemeine zu pfenden so mugen aber si noch einem itlichen vorgangen zinstag, wenn si des nicht lenger emperen wollen den vorsessen zinse und zinspusse, die doruff gewachsen weren uff unser und der ganzen gemeine scheden nemen zu cristen ader juden mit vollein rechten und was si des scheden nemen wurde, die geluben wir in mit gesambter hant ganz und gar ausrichten und bezalen unuerzogenlich an alles geuerde bei unsern guten treuen, auch hat der egenant Hannus und sein erben uns und unserr gemeine das getan zu einer besundern beheglichkeit, wenn wir in bezalen das offgenant haupgut miteinander das sein dreisig schok der obgenanten grosschen dorzu den vorsessen zinspusse, die doruff gewachsen weren, das wir denne furbas von dem egenanten zinse ganz und gar sullen frei sein und ledig und wer disen briue mit des vorgenan Hannus und seiner erben gutem willen hat ausgenumen geistlich und geordent leute dem geburen alle recht zu dem zinse die do obengeschribensten des zu einem gezeugnuss so haben wir mit unserm gutem wissen das grosser insigel unserr gemeine an disen briue gehangen. Der gegeben ist noch Cristi gepurt firzehenhundert jar dornoch in dem zwenzigisten jare des freitags vor Marie Magdalene.