Přepis regestovaného dokumentu

Vnsern willigen Dinst zuuor liben herren. Wir lassen euch wissen, das vnsers gnedigen herrn konigs gnade pey vns war am aschentag in der andern stund zu naht, vnd redte mit vns mancherley, des wir ewch zu diesem mal nicht verschreiben konnen, vnd dancket vns zu mal sere, er wolt vns diser dynste nymermer vergessen, vnd sprach zu vns, wes wir sein kunigliche gnade piten weren, das vns vnd der stat nuczlich were, darynne wolt er willig sein vnd wolt das gerne thun. Dorumb piten wir, das ir darumb alle aynigt werdet mit einander, was der stat am nutzlichsten wer, vnd schreibt vns ewr gancze maynunge pey tag vnd nacht pey geritten botschafft, ye auf den freytag zu abent, darynne wollen wir vnser pestes thun vnd nicht sewmig des wir kunnen vnd mugen. Auch lieben herren sein wir zu rate worden, ob euch gefelleich das wir frey als weren XV jare vnd alle jar ein clostewr nemen von vnsern armen lewten, vnd das auf die pfleg furpas nymant kein gelt verschriben wurde, vnd auch ob wir das salcz mochten zu vns pringen, als ir des vor lang willen habt gehabt vnd ob ir sust keinerley mer zu rat würdet, das last vns pey tag nacht wider wissen auf den freytag zu nacht oder auf den sunabent fru. Geben zu veld vor Cladraw am donerstag vor Invocauit.