Přepis regestovaného dokumentu

Durchluchte hochgeborne furste, gnediger lieber herre! Myne undertenigen willigen dinst uwern gnaden alleziet bereyt. Als uwer gnade denne nest mynem herren dem bisschove von Miessen brieffe gesand had, die her vort herren, mannen unde steten in das lant zu Lusicz, in die Sechsstete senden solde als von des gesaczten geldes wegen inzufordern, als sint dem genanten mynem herrn dem bisschoffe diese brieffe, die ich uwern gnaden hie sende, zu antwert wurden. Unde er ist vil, die nicht antwert gegebin haben. Wuste nu uwer gnade keynen rad darzu, wie man sie geistlichen adder wertlichen darzu brechte, daz sullich gelt gegeben wurde, da welde ich an myme enden zuthun, als vil als ich vormochte. Denne is machen ere dreye; wie man die kunde obertufeln geistlichen adder wertlichen, so gebin is die andern alle hernach her: in den Sechs landen unde steten machen is die von Gorlicz unde die manne doselbist, in dem lande zu Lusicz der apt vom Dobirluge unde die stad zu Luckaw. Wuste nů uwer gnade keynen weg, wie die drie partien anzurichten weren, so gefyle gar eyn redelich gelt in den selbien landen. Von den keczern kan ich uwern gnaden nicht nůwer zetunge schriben, denne daz sie noch vor Bechen legen; dem Smyriczken dem had eyn pherd eyn beyn enzwey geslagen, daz die keczer iczunt gar ungemůhet bliben unde en thut nymand nicht, das der Smyricke so dernedere liet. Ich bitte uwer gnade, ir wullit mir nuwe zetunge schriben, ab ir icht gutes adder arges wisset. Daz wil ich umme uwer gnade gerne vordinen. Gegebin zu Dresden am montage nach vincula Petri under mynem ingesigel.

Hans von Polenczk voit zu Lusicz und lantvoit zu Miessen.