Přepis regestovaného dokumentu

Ich Lucas Salczer bekenne und thun kund offenverlichen mit diesem briff allen, die in sehen ader horen lesen, das ich mit wolbedachtem mute und mit wissen und rate meiner frunde von den erbern hern burgermeister und vom rate czu Olomucz die foitai doselbst czu Olomucz und die mul Kutlmul genant mit aller zuhorung, mit den wiesen und mit dem teich unczen an die statgreben und mit anderm, das darczu gehort und mit allem rechtem, als der hawptbriff awsweist, gekawft hab und kawffe in kaft dicz brifs, mir, Barbarin, meiner hawsfrawn, und unsern erben umb eindleff hundert mark guter prager groschen und merherischer czal vier und sechczig groschen vor yede mark czu rechen, die ich in ader wem sie schaffen vortreten und awfrichten sal. Dorumb ich mich czuhancz der egenantern foitai und mul mit aller czuhorung underwurden hab und douon ich von datum dicz briefs die czinse so dorauff vorschreiben sein und furbas geen werden geben und reichen sal unczen ich sulche czins abledige mit dem hawptgelt von der egenanten summen eindlef hundert mark und was doruber sein wirdet das sal ich den egenanten hern burgermeister und dem rate awsrichten und wir off mir und meinen nachkummen gepurt einen unterfoit czu setczen so sal sulches albeg noch rat und mit wissen und willen der egenanten hern burgermeisters und rates czu Olmuncz gescheen also das ich noch meine erben und nachkummen beistczer der egenanten foitai keinen unterfoit nicht setczen sollen wider der itcz genanten hern willen sunderlich ist awsgenomen und beredt ab ich obgenanten Lucas Salczer, mein hawsfraw, unsere erben und nachkummen die egenanten foitai czu Olomuncz und die mul mit irer czugehorung vorkawffen wolden so sallen wir und unsere nachkummen der czum ersten die egenanten hern burgermeister und dem rat czu Olomuncz anpiten und in der gunnen fur anderen wolten sie dan die nicht kawffen so sollen wir die mit irem willen und wissen vorkawffen einem frumen man, dem sie der auch gunnen werden des czu einer sicherheit und geczewgnuss haben die erbern Paul Gunther, Augustinus Niderl ire sigel neben meinem insigel durch meiner fleissigen gebete willen an diesen brief gehangen in und iren erben an schaden. Geben am suntag vor Andree apostoli anno domini millesimo quadringentesimo tricesimo quinto.