Přepis regestovaného dokumentu

Frederich und Hannus gebrüder von Hockinborn den irbarn und wol weisen burgermeister und rothmannen der stadt Zittaw, unsern liben nockebern und besundern guten fründen. Also ir uns herzoge Hannus bryffes abeschrift ingeslossen sendet et cetera, unser antwort hert, das ir en dy hett zu schryben. Habit ir unsir vorige antwort vornommen, was wir den von Gorlitz eyne fart, dy ander zu antwort geschrebin habin et cetera, und dobey gebeten, doran wollin zu sein, das uns dy von Gorlitz einen tag vor sich wellen legen in demselben irem betedingeten frede und uns wellen irkennen et cetera. Das hat uns bis an dese zeit ny mocht geschen et cetera. Sy bekennen werden, das sy zwischen uns eynen frede gemacht haben bis uff sante Johannes tag und das unsere gefangene bis uff den tag tag habin sullen und ungamnt bliben. Das hat uns, unsern armen mannen und gesellen nicht kunt gehalden werden, sunder sy haben must swerlichen gefangen legen und ein myl ym nachreiten und zeren. Das den von Görlitz selber wissentlich ist, das sys zu einem sulchen ny haben kunt brengen, das uns gehalden werde, also sy es getedingt haben et cetera. Bitten wir uch mit besunderm fleysse, sulche mergliche gewelde und verrath wollen anzusehen, dy uns und unsern mannen und gesellen und iren armen leuten weder ire gleich und recht wederfert et cetera und wellet is zu eim sulchen brengin, das sy uns ir hülffe thun umb sulche brüche et cetera. Geben uff den kommenden nesten sontag vor Johannis baptiste.