Přepis regestovaného dokumentu

Ich Hans von Bebirsteyn nochdeme als ich von deme unobirwuntlichen meynem allirgnedigisten herrn herrn Segemunde Romischim et cetera keyser von der kaufleuyte wegin von Breczlaw gescheidin bin, das ich mich sulcher zicht vor euch gestrengen, erbern, tuchtigin unde wolweisin manne und stad Gorlicz rechtfertigin sulde, dye denne dy kaufleyyte vor meynen allirgnedigisten herrn obgenand unde dy seynen brocht haben, nu had ir vornohmen, wy meyn gnediger herre herr herzug Heynrich der selbittin thetir eynen, der den nohm hod helffin nehmen, herbrocht, unde had ir seyn bekentnis schriftlichin eygintlichin vorhord unde mir das lesin lossin, dorynne ir selbist, also ich hoffe, meyne unschaulth vornemit, des mich denne auch meyn herre herzug Heinrich vore, der mich vor seyne man dorumbe fordirte, vorwust hod. Sundir also ir herzug Hanns bekentnis mich hod herin lossin, dorynne her berurd, das das gut kegin dem Forste unde ford kegin Cotbus komen were et cetera noch innehaldunge der zedil, doruff ir denne meynes vettern unde ohmen antword vorstanden had unde noch vornehmen werdith. Sunder also her berurd, dye selbitten rouybir werin kegin Storkaw in meyn haus unde stad komen mit deme raube unde hettin den ganzin winthir do gelegin, sy worin hen komen, unde Wenczlaw meyn son hatte sy in meynem abewezin geleitit, und wuste von deme nohme keynis, den sy ouch hen nicht bracht habin. Do he vornam, das sy so zugegriffen hatten, do sagitte her en das geleyte uff. Do ritten sy erin weg, das do wissintlichen ist geistlichin unde wertlichen meynen herrn und nockobern. Unde berurd ford, das Fredrich meyn son Feczencz Starczedil seynen teyl abegekauft sulde habin unde en uff gnomen et cetera, unde dy von Bebirsteyn, also her hette hord sagin, hettin doran gnis unde lipnis gnomen et cetera, also denne das bekentnis eygintlichin inneheldid unde ausweyst, doruff sage ich gnant von Bebirsteyn von meyn unde meyner sone wegin: neyn. Unde wer michs zeith, der thud mir unrecht unde gewald, unde bitte mich zu rechtfertunge, nachdem also ich denne von meynem gnedigisten herrn gescheidin bin. Unde welde dy ymand vor euch von mir ufnehmen, dy wil ich iczund hy thun uff desin heuytigin tag, das ich weddir roth, toth addir bewust dorum habe. Unde durch merir bescheydinheid wille bitte ich me: Wer is weddir meynen allirgnedigisten herrn, euch noch andere seyne land unde stete nicht, ich welde dyselbten tethir suchin lossin unde das sy geleyt werdin, das man dy vorhorin mechte, an den ir auch vornehmen werdid meyne unschauld. Unde bethe euch also, meyne gutten nockobir unde frund, mir eyn sulchis nachzusagin, unde ab mirs noth thun worde, euir bekentnis dorobir gebin wollid. Das wil ich fleyssiglichin vordynen.