Přepis regestovaného dokumentu

Sigismundus, Dei gratia Romanorum rex semper augustus ac Hungariae, Bohemiae, Dalmatiae, Croatiae etc. rex, notum facimus tenore praesentium universis. Etsi regiae dignitatis benigna sublimitas se cunctis fidelibus ditioni suae subiectis exhibet gratiosam, illos tamen complectitur praecipue non indigne favoribus gratiarum, qui rerum experientia nascuntur ampliori devotionis et fidei constantia circa nos et praedecessores nostros et signanter istis temporibus Wiklefistarum haereticorum insultibus et eorum frivolis machinamentis fortiter resistendo prae ceteris claruisse. Sane pro parte civium et incolarum opidi forensis in Thyn Horssoviensi districtus, fidelium nostrorum dilectorum, celsitudini nostrae cum humili precum instantia extitit supplicatum, quatenus ipsis de innata nobis pietate et solita benignitatis clementia privilegium quondam venerabilis Sbinconis, archiepiscopi Pragensis, necnon universa et singula alia ipsorum privilegia, iura, literas, indulta, libertates et gratias, ipsis a venerabilibus archiepiscopis ecclesiae Pragensis data et concessa ac datas et concessas approbare, ratificare et confirmare gratiosius dignaremur. Nos igitur, qui vota quorumlibet fidelium nostrorum, iusta et rationabilia petentium, clementer amplectimur, attendentes praedictorum civium opidi forensis in Thyn, spectantis ad ecclesiam Pragensem, immotae fidei puritatem necnon grata et fidelia obsequia, nobis et coronae Bohemiae hactenus potissime contra Wiklefistas, nostros et fidei catholicae frivolos et pertinaces adversarios, constanter impensa et processu temporis uberius impendenda, ipsis privilegium Sbinconis praedictum necnon universa et singula alia privilegia, literas, iura, indulta, libertates et gratias, ipsis ab archiepiscopis ecclesiae Pragensis data et concessa ac datas et concessas, in omnibus suis tenoribus, punctis, clausulis, articulis et sententiis, prout de verbo ad verbum sonant, acsi tenores omnium et singulorum de verbo ad verbum praesentibus inserti et insertae forent, non per errorem aut improvide, sed animo deliberato et ex certa nostra scientia approbavimus, ratificavimus et confirmavimus, approbamus, ratificamus et vigore praesentium regia authoritate Boemiae gratiosius confirmamus, decernentes et volentes expresse ea perpetuis inantea temporibus inviolabilis obtinere roboris firmitatem, iuribus tamen et dominio archiepiscoporum ecclesiae Pragensis et eiusdem ecclesiae semper salvis. Praesentium sub nostri regalis sigilli appensione testimonio literarum. Datum Cashoviae anno Domini millesimo quadringentesimo vicesimo tertio feria quinta post festum Inventionis sanctae Crucis, regnorum nostrorum anno Hungariae tricesimo septimo, Romanorum tredecimo, Bohemiae vero tertio.