Přepis regestovaného dokumentu

Von gotz gnaden Conrad zů Mentz Dietherich von Colne Otto zů Triere erzbischöfe dez Romschen richs erzkanzler etc. und Ludwig pfalzgraf bi Rine dez heiligen Romschen richs erztrůchseß und herzog in Peyern alle dez Romschen richs kurfursten.

Unsern frúntlichen grůs zůvor. ersamen wisen gůten frúnde. als leider die lande umb und umb wildiclich gestalt sint, und vile und mancherlei rouberi und úbeldat beide uf wasser und uf lande gescheen, und zů besorgen ist, wo man den in zit nit widerstee und darwider si, daz ir ie me und me werde: dez habent wir uns ieczunt, als wir uf einem tage hie zů Boparten bi einander gewesen sin, mit einander dovon underrett, und meinen daz es gůt were daz herren und stette darzů gedechten umb einen gemeinen friden der lande zů machen. und haben darumb einen andern tag gen Franckfurt, die stat auch den landen unden und oben gelegen ist, bescheiden uf den sontag sant Ulrichs tag nehstkompt zů naht da ze sind und uf den mentag von den sachen zů reden. und herumb so begern wir, daz ir uch dazwuschent mit uwern frunden und den die zů uch gehorent wollent davon underreden, und uwer erbern botten und frunde uf den obgenanten sant Ulrichs tag mit maht zů uns gen Franckefurt schicken furbaß von den sachen zů reden und darin zů besliessen als sich dann geburte. geben zů Boparten uf unsers herren offart tag anno etc. 23.