Přepis regestovaného dokumentu

Unsere willige dinste zuvor, ersame weisen herrn und besunder gunstigen frunde! Als ir uns geschreben habit, das ir vornomen hettit, das die vorzweifelten keczer wieder von enandir zu rethen weren et cetera, und bittit, euch mit diesem uwern boten zu vorschreiben, ap ir sulcher sendunge der 30 pherde mocht obir gesein, umb zu vormeiden kaste und zerunge et cetera, doruff thun wir euir ersamkeit zu wissen, das wir andirs nicht horen und wissen, denne das die vordampten keczer noch vor Collen legern. Und so ist her Jon von Wartinberg, der sulcher keczereie ir mittebruder wurden ist, in eigener person zu in gerethen und haben als nu am nehst vorgangen freitage 31. Oktober, als uns gesagit ist, zu den, die die stat Collin halden, gesturmet und haben, das got gelobet sey, nichtis mocht geschaffen. Und wir besurgen, wenne sie do abezihen werden, das sie der egenante herr Jon, als ir wol wisset, der seine slos und gutere an dieser lande grenicz harte legen hat und die im herr Sigmund von Tetczin vormals zu grunde vorterbit hat, diesen landen und steten zu schaden und vorterbnisse obirfuren werde. Und dorumb wir euch sulcher sachen kein ganz ding zu diesem mole nicht vorschreiben mogen, sunder bis morne wirt der gestrenge Hanns von Polenczke unsir vorweser zur Lobaw bey landen und stete sein, die euch mit sampt uns umbe sulche sachen, als euch wissentlichen ist, auch geschreben haben; an die wellen wir euir vorschreibunge und beger gerne brengen. Was wir denne sulcher zeitunge do von in horen und zu antowort vornemen, das wellen wir euch vorschreiben bey unserm eigen boten. Und was wir euir ersamkeit in den und andern sachen zu dinste werden mogen, dozu sey wir allezeit willig. Geben zu Gorlicz am dornstage nach allirheiligen tage undir unserm stat secret anno et cetera 27.

Burgermeister und ratmanne der stat Gorlicz.