Přepis regestovaného dokumentu

Ich Hans von Polenck, munczmeister des bergs czun Chutten, bekenne mit diesem offen brieffe vor allen den, die in sehen ader horen lesen, als getedinget ist czwischen den gestrengen Henczen von Knaw, Caspar von Wolfferstoff, hauptluten myns genedigen herren, marggraff Wilhelms und nur als von des brieffs wegen den myns herren marggraff Wilhelms mann hern Boczken von Podebrad von irs gefenknisse wegen off fumffhundert schok gegeben haben, den selben brieff glob ich vorgeschreben, Hans von Polenczsk dem hochgeborn fursten und herren, herren Wilhelm, lantgraffen in Doringen und margraffen in Myssen, myme genedigen herren und czu getruwer hant den genanten Heinczen und Casparen vor unser liben frawen tag der leczten nehstkomen weder czuschicken. Were, ab ich doran gesumpt wurde und nicht getirn kunde, so glob ich den vorgenanten mynen globern fumf hundert schok gut Behmischer groschen off den genanten unser liben frawen tag der leczten off dem berge czun Chutten, ader in der stat czu Collen, wo do myne glober hin risen, ane argelist und an geverde gutlich czu beczalen und secze douor czu burgen die erbern und wisen richter und scheppen und gencz gemeyne des berges czun Chutten und wir vorgenante richter und scheppen und gancze gemeyne bekennen, das wir burgen sint und globen mit disem offen brieffe vor den genanten Hans von Polenczk, den munczmeister et cetera, alle stucke und artikel dieses brieffs dor und noch geschreben, stete und gancz czu halden ane argelist und geuerde. Were nw, das wir an der beczalunge suinik wurden, und off die czit, als vorgeschreben stet, nicht beczalten, was dann moglich schaden douon geschehe, den globen wir czu beczalen glich den hauptgut. Des czu urkund und merer siderheit hab ich, obhenanter Hans von Polenczk myn ingesigel mit gutem wiken an disen brieff gehangen, und wir, obhenante burgen richter und scheppen und gancze gemeyne des berges czun Chutten haben auch unser berg insigel an disen brieff czu rechter urkund an diesen brieff sic gehangen. Der geben ist uff dem berge czun Chutten nach Crists geburt virczenhundert jar dornach in dem ein und czweinczigisten jare des suntags jubilate.