Přepis regestovaného dokumentu

Vnsern freuntlichen, willigen dinste czuuor. Erbern, weisen, besundern gunstigen, liben freunde. Nochdem vnd ir wol wisset, wie wir von den Hussen grosse vnd tegliche anfechtung haben vnd hart gedrungen werden vnd nyndert kein sichern wege noch strasse gehaben konnen zuzufüren notdurfte vnd nicht alleyne von den Hussen sunder auch von vnuerschulter sache wider got vnd recht veintschaft vnd vnsicherheit haben von Czalta, herren Colobrathen, Burjan, hern Crussyna von Swamberg vnd andern auslendischen beyerischen vnd voitlendischen, des wir doch von des heiligen cristenglaubens vnd vnsers gnedigisten herrn kunigs vnd rechtens wegen von in nemlich die czeit scholden muglich vortragen sein, sulchen vnwirden widerczusteen mit sulcher hulffe, als wir iczund begnadet sein wir nicht vorgesein konnen, als ir selbes wol erkennen mugt vnd vns doch in keiner weise mit den Hussen meynen zu seczen vnd czu befriden. Darumb biten wir ewer erberkeit freuntlich vnd mit dinstlichem fleisse, wan wir vns vorsehen, das ewr weisheit czu sulchem tage iczund gen Nuremberg ewr freunde auch fůgen werde vnd wir leider von grosser vnsicherheit wegen vnsere freunde iczund dahin nicht bestellen konnen, das ir sulche vnser notdurft bey disem vnserm boten bass wenn wir geschreiben konnen den fursten, herren vnd steten nochdem vnd mir iren gnaden auch sunderling darumb schreiben vnd biten fürtragen vnd vnser zum pesten gedenken wollet als wir ewer erberkeit des genczlich zcugetrawen, also das vns von iren gnaden stercker vnd redliche hulffe czugefügt werde. Des wir hoffen das wol vor vns vnd euch selbes sein wirt. Des geburt vns vor aller cristenheit vnd beuoran vnserm gnedigsten herren kunige mit fleisse czu bedancken vnd selbes getrewlich czu uordinen. Geben an allerheiligen abent anno XXIX°.