Přepis regestovaného dokumentu

Nos Ladman, Musse, Michael et seniores judei totaque communitas judeorum in ciuitate Nowa Pilzna presentes et futuri habitantes, tenore presencium recognoscimus uniuersis et singulis testificantes, prout a prudentibus et honestis dominis magistro ciuium, consulibus et juratis a totaque communitate ciuitatis Nowe Plzne aream quondam Mathie Coloni, iacentem ante ciuitatem Nowe Plzne penes curiam Nicolai Hinkonis parte ab una ei Mikssonis Kozzie parte ab altera cum fundo iusto vendicionis titulo emimus pro nostra sepultura, pro summa duodecim sexagenarum grossorum bonorum argenteorum pragensis monete, de quibus duodecim sexagenis grossorum duas sexagenas grossorum ipsis dominis consulibus et communitati ciuitatis prefate parata in peccunia persoluimus et super residuis decem sexagenis grossorum unam sexagenam grossorum census annui et perpetui nos, heredes et successores nostri prefatis dominis consulibus et communitati ciuitatis sepetacte aut illi seu illis, quibus suprascriptam unam sexagenam grossorum census annui et perpetui condescenderent, tenemur et debemus soluere et censuare, quam quidem prefatam sexagenam grossorum suprascripti domini consules et communitas sepedicte ciuitatis Nowe Plzne honorabili et religioso viro domino Nicolao plebano presenti et futuris plebanis ciuitatis sepenominate in nobis libere et beniuole condescenderunt, quare virtute presencium nos supranominati seniores judei, presentes et futuri et tota communitas judaica, qui in iam dicta ciuitate Nowa Plzna habitamus seu habitabimus, promittimus bona nostra fide iudaica sine quouis dolo malo prescriptam sexagenam grossorum census annui et perpetui incipientes a data presencium semper in festo sancti Georgii quolibet anno perpetue prenominato domino plebano et futuris plebanis sine quauis dilacione parata in pecunia soluere et censuare et non dato censu in termino prefato quocumque anno mox prescriptus dominus plebanus et futuri plebani plenam debent habere virtute presencium potestatem, auctoritate tamen judicis et juratorum in iam dicta ciuitate existencium, scolam siue sinagogam nostram claudere et nos ad soluendum suprascriptum censum per potenciam judicis et juratorum compellere quocumque modo et quociens oportunum fuerit, sine strepitu et omnis querele judicii, et qui presentem literam de bona voluntate prefati plebani seu futurorum plebanorum habuerit, eidem ius competit omnium premissorum. In quorum euidens testimonium et robur valiturum prudentes et honesti viri, magister ciuium, consules et jurati ciuitatis sepenominate ad peticionem nostram sigillum maius eorundem presentibus est appensum. Datum et actum anno domini millesimo quadringentesimo tricesimo secundo, in die Epiphanie.