Přepis regestovaného dokumentu

Noch Cristi geburt 1432 des suntages an der heilgen zwelf boten tage sand Petri et Pauli habin geteidiget die edelin herrn herr Ulrich von Bebirsteyn herre zu Soraw, her Hannus von Coldicz herre zu Grawppen und manne unde stat zu Gorlicz zwischen den edeln herrn herrn Thimen von Coldicz, verwesir der lande und stete Budissin, Gorlicz et cetera, an eynem und herrn Ulriche von Bebirsteyn, herren zu Fredeland et cetera, am andern teile, also das allirley sachen zwischen in umbe allirleye broche, zweytracht und schelunge, die zwischen in gewant und gelegin sein, keins usgenomen fruntlichin vorricht, entscheidin und hingelegit seyn. Sunder wurde Wentsch von Donyn herrn Thymen von Coldicz vergenant umbe das geleithe anlangen adir beteidigen, dorynne der egenante her Ulrich von Bebirsteyn, herre zu Fredeland et cetera, herrn Wentsch von Donyn gefangen hat, so sal der obgenante herr Thimo von Coldicz den vorgenanten herrn Ulrich, herrn zu Fredeland, vorheischen vor mann und stat zu Gorlicz. Do sal im herr Ulrich, herre zu Fredeland, vorreithin und do im thun von synes amechtis und des geleithes wegin, als vil als manne und stat zu Gorlicz irkennen. Ab der manne unde stat zu Gorlicz doran icht broch wurde, das sie is nicht gerichten noch irkennen mochten, so sein zu abermannen gekoren mit ir beider wille die edelin herrn her Albrecht von Coldicz, foyte der lande und stete Budissin, Gorlicz et cetera und houptmann der furstenthum Sweydenicz und Jauwer, und herr Ulrich von Bebirsteyn, herre zu Zoraw; und was die dorein sprechin wurden, das sullin sie beide halden und thun. Und umbe alle scheltwort briflich adir muntlich, dy zwischen beyden teiln geschen seyn, dy sullin mechtiglichin stehn uff dy vorgenanten edeln herrn herrn Albrecht von Coldicz unde herrn Ulrich von Bebirsteyn, herrn zu Zoraw. Und in desin entscheit sein methe eingezogin alle, die an beidin teiln in die fehde komen seyn adir dorunder vordocht sein mit worthen adir mit werken, und nemelich Nickel von Tucheris mit synen; und also, das der vorgenante her Ulrich von Bebirsteyn, herre zu Fredelant, in des obgenanten herrn Thimen von Coldicz phlege mit gewalt nicht greiffin sal, das den seinen ouch nicht gunnen sal zu thun noch gestaten, nemlich in die Sechslande unde stete; dasselbin gleich her Thimo von Coldicz ouch nicht thun sal, den synen ouch nicht gestaten noch gunnen us der genanten synen pflege kein dem obgenanten herrn Ulriche von Bebirstein, herre zu Fredelant, noch kein den synen zu thun. Auch ist Konigishain in den entscheit methe eingezogen umbe alle scheltwort, dy zwischen herrn Ulriche von Bebirstein, herrn zu Fredelant, und im gescheen sein, also das sy is ouch mechtiglichin blebin seyn by mann und stat Gorlicz. Und dese obgeschrebin vorichtunge und entscheit habin die vorgenanten edeln herrn her Thimo von Coldicz, vorwesir der lande und stete Budissin, Gorlicz et cetera, und her Ulrich von Bebirsteyn, herre zu Fredelant und zum Furste, eyner dem andern mit munde unde mit hande gelobet ane arg stete und ganz zu haldin. Des zu eynem bekentnisse und mehr sichirheit ist desir anloz und entscheitbriff vorsegilt under Fredemans von Gersdorff ingesegil von des landis wegin und under unserm statsecret.