Přepis regestovaného dokumentu

Noch Cristi gebort 1400 jor dornoch in deme 35. jor an deme tage sinte Martini des heiligen bischoffs haben geteydinget dy gestrengen Heyntze Kotwitz heuptman, ersamen und wolweisen bürgermeiser und rathmanne der stadt Görlitz zwischen dem edeln herrn Thymen von Colditz foyte der Sechslande und stete Budissin, Görlitz et cetera an eynem, und dem edeln herrn Ulrich von Bebirsteyn herrn zu Fredeland am andern teile, also das sy beyderseit schreiben sullen dem hochgebornen fürsten und herrn herzoge Heynriche herzogen in Slesien und zu Grossen-Glogaw und seyne gnaden bitten, als iren gewolten und gekoren richter, das her in eynen tag lege in desin nehstkommenden 4 wochen et cetera. So sy denne vor seyne gnaden zu tagen kommen, so sal der edle herr Thymo von Colditz herrn Ulrich von Bebirstein schuldigen als von Frederich Metzenrodes und Hannus Kewlen der gefangnen wegen, also bescheidenlich, das der genante herr Thymo herrn Ulrichen von der gefangnen wegen schuldigen sol. Is, dass erkannt würde, das her dy gefangnen mit gleiche und mit rechte hette, so sulde her sy behalden. Würde abir irkannt, das her sy mit gleiche und rechte nichtin hetten, so sulde her sy auff denselbigen tag ungeferlich ledig und losslossin et cetera. Was der obgenante fürste aussprechen würde, welch teil das nichten hilde, der sol deme andern teil 200 schock vorfallen sein und dy off den benanten tag ausrichten et cetera.