Přepis regestovaného dokumentu

Johannes von gottes gnaden marggrave zu Brandenburg und burggrave zu Nürmberg et cetera burgermeister, ratmannen und der gantzen gemein der stat Gorlitz. Wann ir vileicht wol vornommen habt, das die ketzer von Behem un unser lande gezogen und das zumal groblichen mit mordt, prandt, rauberey und andern beswerungen onerbermlichen beschedigen, verheren und vorderben et cetera; und wann wir nu gantz innerlich bewegt sein, solchem ketzerlichen gewalt zu understehn, zu weren et cetera: hierumb so sein wir mit unsern mannen und steten eintrechtiglich zu rath worden et cetera, das wir mit etlicher unser trefflicher herren und fründen hillfe und beistande streites mit den obgenanten ketzern pflegen vullen. Und haben desselben streites unser sammunge et cetera den sunabend vor dem sontage misericordia domini 3. Mai. Nu bitten wir euer ersamkeit mit gantzem, als hoch wir euch umb gots, der cristenheit, auch umb unser gnedigsten herrn konigs, und auch umb unsern willen gebieten und ermahnen konnen und mügen, das ir euch, got und uns darnach zu beistende, auff den obheschriben sunabend mit aller eur macht, so ir mit euch und andern den euern et cetera umb oder in unser stat Francfurt fügen und uns zu solchem streite folgen et cetera. Geben zum Berlin am heiligen osterabende.