Přepis regestovaného dokumentu

Unsen fruntliken, willigen dinst thuvor, ersamen liven herren unde gunstigen frunde! So gy thu uns jüwen dynre und gesinde med eynre credencien gesand hebben, eczwas an uns tu wervende et cetera, also heit der sülvie juwe dynre uns gebehden, juwer ersamphteit gelegenheit der vordampton ketther tu schriven. Duhn wy juwer live tu wehten, dat wy oük einen unser knechte bevolen hadden, dat hie solde ryden tu dem gestrengen Hansze van Polenczk und an deme eigentlike botschapp erfarn. Also heit uns der sulvie unse knecht van Luckow schriftlike sulke botschapp bracht, dat Hans van Polenczk egnant van den van Kamencz gebehden were, dat hie wolde und hebbe die sulvie stad Camencz med dehr tubehorungen vordinget; sünder dat closter Morgensterne wolden die ketther nicht in der vordingnisse hebben. Unde sollen itzund med der wagenborch tu Witchenawe liggen. Ouk hebben wy vornohmen in diesser sulvien botschapp, dat Hans van Polenczk und etlike siene mannen, die med om in der ketther heer gewest sien, sollen geseht hebben, dat die gewaldigisten des heeres in Behmen noch nha eyme heere gesand hebben. Unde würd et sake, dat one dat heer und sulke hulpe qweme, so wolden sie vor dem Hagen, tu Liwenwerder und tu dem Yessen tüsschen die Sprewe und Elster thien. Qweme ön aber nicht vorder hulpe, so wolden sie in hertoge Heynricks land in die Sleysie thien. Des sulvien glick ouk die gefangen, die nihelich uth deme here komen sien, geseht sullen hebben, dat sie des eyn worden sien. Wes wy uwer ersamen wysheit vorder in den unde anderen saken tu dienste werden mögen, dat duhn wy mit flite willicklich gerne. Geschreben under unser stad ingesegel am sondage misericordia domini anno et cetera 32.