Wir Sigmund von gotes gnaden Römischer kunig, zu allen czijten merer des Richs, Vnd zu Vngern, zu Behem, Dalmacien Croacien oc. kunig, Embieten den Burgermeister Ratmannen vnd Burgern gemeinlich der Stat zu Budissin, Vnsern lieben getruen vnser gnade vnd alles gut. Lieben getruen wie gar grösslich der Wicleuisten die man anders hussen nennet, vnglaube, vnsynne, ubeltate, vnd vnredliche werke, die Sy mit zerstörung kirchen, vnd manichen andern vnmenschlichen dingen, langezijt begangen haben vnd teglich begeen, wider Cristenn glauben, die heilig Romisch kirche vnd dorumb ouch wider vns sind, Ist nit notdurft euch zuuerschriben, nach dem vnd das vast wijte gebreytet vnd landkundig ist. Wann Wir nu solichs vngloubens ye nit zu leden meynen, Sunder den mit gotes Hilfe gentzlich uszczuietten vnd zu tilgen, Vnser kungriche zu Behem dauon zu reynigen, vesten willen vnd doruf vnsern vndertanen vnd getruen vmb vnd vmb heffticlich gebotten haben, wo Sy wicleffisten, Sy sin geistlich oder werntlich, ankommen mögen, das Sy die ufhalden, vnd vahen. Vnd die gewihte, oder Geistlich sind, Irem Bischof entworten, vnd die werntlichen, die sich bekeren von Irem vnglauben laszen, bihten, bûsz empfahen, zu vnserm cristenlichem glouben wider treten, vnd der heiligen römischen kirchen fur- bass gehorsam sin wollen, zu Iren obristen, die Sy zuembinden maht haben, füren laszen sollen, solich bihte zu tund, vnd heilbere bûsz zu empfahen Als dann das vnser glaube vordert, vnd die heilig kirch gebotten hat, welich aber vnder den vorgenannten wicleffisten also nit wider keren wollen, Sunder In Irem vnglauben zu bliben meynen, Das Sy die an libe vnd an gut strafen, tilgen, vnd zu In richten, als sich dann das von Rechte gebüret. Vnd nemlich, das Sy sich aller Ir gütere vnd habe von vnsern wegen vnderwinden sollen, vnd wann wir vns versehen, das vicleffisten zu euch gen Budissin villiht ouch kommen möhten, Ir handlung oder gewerbe daselbs zu suchen, Dorumb ist vnser gantze vnd ernste meynung. Vnd wir gebieten euch ouch vesticlich mit Disem brief, was Ir der ankommet, das Ir damit gefaren vnd tun sollet, als dauor von In begriffen ist, Als liebe Euch vnser hulde sy. Geben zu Bresslaw, des nechsten fritags nach sant Gregorien tag, vnserer Riche, des Vngarischen oc. in dem XXXIII, vnd des Römischen in dem X Jaren.