Přepis regestovaného dokumentu

In gotes Namen amen. Wir Niclas und wenczeslaus von gottes genaden herczogen zu Troppaw und zu Ratibor. Bekennen und thun kunt offentlich mit disem briefe vor allen den die In sehen horen oder lesen. Das fur unns komen ist den Edel und Gestreng Rytter Herr Bielik Kornicz von Oderberg unser lieber getreuer und hat uns gebetten das wir im genedigklich geruchten eine bestetigung zuthun der dorffer und gutter Alt Zabylkau Neu Zabylkau odra Elgota und puodlau die er von den Edlen und woltuchtigen unsern leíeben getreuen Czenken und Niklasen gebrudern von Turkau und beneschen von Swrtklau gekaufft beczalet und besessen hat und sy Im vor unserm lieben vatter dem got genad nach gottes geburt vierzehenhundert und Im drey und zweinczigsten Jar sind aufgeben und aufgelassen des haben wir angestehen seine bite und getreue dienst die er uns manichfeidigklichen beweiset hat und ob got wil noch beweisen wirt und sol in Zukunftigen Zeiten und haben demselben herrn Bieliken seinen Erben und Nachkomlingen die obgenanten dorffer und gutter Alt Zabylkau neu Zabylkau odra lgota und pudlau mit allen czinsleuten czinsen renten und gennossen nuczen nuczparkeiten mit Eckern gearn und ungearn sowon gebaut und ungebaut mit mulen mulsteten welden puschen streussen wisen wisewachsen wasserflusse sehen teichen und teichsteten mit allerley furstlichen herschafften obrsiten und nidristen gerychten in allen freyheiten rechten greniczen ottern und enden und mit allen zugehorungen kleynen und grosen wie die genant sein keine ausgenomen als dieselben dorffer und gutter von alders bis daher gelegen sint haben bestetiget und gelihen und sy in bestetiget und leihen in manrechte zu haben zu halden zu besiczen und damit zu thun und zu lassen unschedlichen unsern diensten die sy uns unsern Erben und Nachkomlingen fursten zu Ratibor von den obgenanten dreyen dorffern Alt Zabylkau Neu Zabylkau und der oder mit einer Glassen als glassenrecht ist und von den zweien lgota und pudlau mit einem gutten schuczen wolgeriten gewapnet und zugericht als offt das notturfft wirt sein sollen thun und heissen mit Urkund dies briefe vesigelt mit unserm furstlichen anhangenden insigel der geben ist an der Mitwoche vor Symone et Jude nach Cristi geburt vierzehenhundert und im achtundzweinczigsten Jar zu Ratibor dabey sein gewest unsire lieben getreuen Mykundey von Jaykowicz, Sstiepan Raschicz von Gaschowicz, Jessek ruben von Rukau, hauptman zu Ratibor, Mikulaß von lan, Strzela und pelka von der belczink, Mikosch von Jaykowicz, Jan von der Boryn, Herr Niclas, thumbherr zu Ratibor unser schreiber und vil ander Erbar leut.