Přepis regestovaného dokumentu

Guntzel von Wussendorff, hofferichter zum Buntzlaw, bürgermeister und rathman doselbst. Unsern früntlichen dinst zuvor, irsamen, wisen, liben herrn! Wir bithen euch wissen, das uns George von Redern mit synen helffern an der metewoche zu obende 13. Mai lesterlichen gemortbrant hat beyde forberge, mölen, dorffer, hoffe, gerthner, scheunen, und aber also hinthe 16. Mai unser dorff Eckarsdorff umb eines sulchen willen, das wir euch und andern irbarn leuthen die recht ober sulche obilteter haben lassen irgeen. So ist uns solche worhafftige botschafft kommen, das er sich beworben hat zu den slossherren bey den ketzhern und wen er gehaben mag, uns zu oberfallen. Dorumb, lieben herren und günner, bethen wir euch dinstlichen, wenn wir uns beworben haben zu Lemberg umb gesellen, das ir uns auch wollet leihen und senden guter fusschützen 10 oder 12 oder so meist ir könnt, wenn so euch, ob got wil, bey uns also wol euch zu frommen werden sein; den wolde wir notdorfft geben und umb se vordynen. Wenn wir doch hoffen, das ir von den ketzhern das mol euch nicht beforen dorffit. Und losset uns mit einem solchen dismol nicht, das wollen wir et cetera. Geben zum Buntzlaw et cetera under des hofrichters segel, am sonnabend noch Sophie.