Přepis regestovaného dokumentu

Mein willigen dinst zuvor, gestrengin woltochtigen ersame weysin herrn unde gunstigen lieben frunde. Ich thu euch zu wissen, das die keczir leydir obirhand gegin myr armen manne unde meynen armen leuten mit nom und mort, brande, schaczunge, gefengnis reytende unde zu fusze genomen haben; unde en vorbas das reyten in keynerley weys nicht gewerin kan, is geschee denne mit euir hulfe. Als habe ich vorgenomen, ich welde meyn herrn, her Ulrich von Bebirsteyn, des vormögen, das her myr hulfe mit zehn pherdin bey mich zu legen, und ich mich fordir selbir meyne anzugreyfin, also das ich dreysik ader 40 pherde zu mir brechte, domete ich den keczern mit der hulfe gotis das gemeyne reyten zu weren meyne: alse begere ich von euch und bitte euch dinstlich, das ir mir hulfe unde rot thut mit speyse, tranck unde fůter, das ich sulche were gote zu lobe und euch allen zu gute dester bas gehalden und getreyben möge, wen ichs leydir mit meynen armen leuten nicht vormak en zu wedirsthen. Dorumb ir wollit die sachin mit euir eldisten unde freunde vorhandiln, was hulfe mir von euch in sogetaner mosze mag wedirfaren, unde des myr euir antwort wurde uff dem nesten tage, zo schirste bey enandir sein werdit, wen ichs andirn landen unde steten ouch vorschreben habe. Das wil ich umme euch gerne vordinen. Gegeben undir meynem ingesegil an deme montage noch Petri.

Nickel Daxsche zum Hamersteine gesessin propria.