Přepis regestovaného dokumentu

Wir Bolko von gotis gnaden Erbeling czu Oppul und herre obirstem Glogaw et cetera bekennen offintlichen in disen brife allen, den di in sehen horen addir lezen, das wir angesehen haben di vorlost der hantfesten, di do vorczeiten gegebin ist wurden obir di mole di do leityn unsir zffortey neheste bei der stat Ostraw vor dem Grabischen tore, und haben von unsir mildikeit in macht dises brifes gegeben eine newe hantfeste dem erben mane Hanus molner obir di vorgenante mole in allen rechten czinczen in allen genisse und czugehörunge als si vor aldirs gelegen hoth. Alzo in solchem rechte, das der vorgenante Hanus molner in allir notdorft und besserunge des gebendis der vorgenanten molen den dritten pfennig zal legen und wir czwene is sei umb pferde umbwagen umb lon der wagenknechte, umb sunderwerk inbescheidikeit zundirlichen ausges nomen das wir allein di pferde mit der futterunge zollen aushalden und was der dickegenante Hanus molner erbeit addir bessirt an der dickegemelten mole salpandir salpdritte salpfirde durch besserunge wille und notdorft des gebendis zo zolle wir zwene pfennige legen und her den dritten auch globe wir im czu dem gebeude und besserunge der molen und czugehorunge czufreien werhafftigen freien walt und czu einer bestetigunge und besser sicherunge der vorberurten stocken habe wir unsir ingsigel undin an disen briff gehangen. Der do gegeben ist czu obirste Glogaw noch Christigeburt ffirczenhundirt jore, dornoch in dem fiervnddreisigsten jore an dem tage des hochgelobten czwelfboten sancti Thome.