Přepis regestovaného dokumentu

Wir Conrad von gotis genaden bischoff zu Bresslaw bekhennen offentlich mit diessem brieffe allen die in sehn odir hoeren lesen, das wir betrachtet vnd angesehn haben manschveldigen vleiss getrewer dienste vnd vheste bestendigkeit strenger haldunge vnd merglicher bey vnd zusteurunge zu schwerer koste und zerunge die unsser und unsser kirchen erbar stadt Neyss ihn desen unsichern zeiten wider die vedampten ketzer von Behem und wider Polacken, die se allhie und der Schlesie zu vorterbnusse und beschwerunge dieser landen besetzt haben, gethon und angeleget und mancherley mergliche schaden und vortebnusse die se bey unss in solchen gescheftnussen entpfangen haben, dauon die genandten unsser und unsser kirchen stadt Neyss nicht inn kleine schuldt khomen ist, der se von eigener macht nicht woll uberkhomen möcht one unser und unsser kirchen mergliche stewer und hůlfe und darumb haben wir mit willen wissen und rath der ersamen herrnd des capittels unsser genandten kirchen zu Bresslaw unsser leieben inn gott bruedern mit woll vorgehabtem rath in unsserem capittel nach gewonheit unsser vorgenandten, kirchen offte gewogen und vorhandelt mit sunderlichen genaden vorsehen und bestattet und haben der vorgenandten unsser und unsser kirchen stadt Neyss gegeben und vorlihen geben und vorleihen zu ewiger eigenkeyt und zu nutze den saltzmargkt der kleinen saltzes daselbst zur Neyss zu halden ewiglichen und zu haben nach unnder unschdlich unser und unssers hofes zur Neyss rechten und herrschafften, die wir und unsser genendter hoff an dem saltzmessen, von den saltzwagen und von den pferden darinne haben; alle oben geschriebene stucke und sachen haben wir stete und gantz und bestettigen die mit sambt unsserm genandten capittel in crafft diess brieffes des zu einer sicherheit und ukrhundt haben wir unsser und des genandten unssers capittels siegel mit wissen ann desen brieff hengen lassen geschehn und gegeben zu Bresslaw inn dem grossen capittel das man jerlichen bey unsser obgenannten kirchen pfleget zu begehen nach Christi geburth vierzehenhundert jar und darchan inn dem vier und dreyssigsten jare dabey seynt gewest die ersamen herrn Nikolaus Zeiselmeister probst, Ottho Bess archidiakonus, Nikolaus Goltbergk scolasticus, Vincentius Jordansmol cantzler, Nikolaus Chronius, Johannes Sekoln, Nikolaus Wettzke, Georgius Lichenberg, Johanne Birke, Nikolaus Weidenaw, Stephanus Wolff, Simon Wartenberg, Nikolaus Kirzka, Nikolaus Swele und Georgius Otthewitz prelaten und thumbherren unsser genandten kirchen nach der capittel glocken allsso gewonheit ist gesammelt.